هند عبد الحليم: عادل إمام قالي عنيكي حلوة جدا وهتبقي حاجة كبيرة
تحدثت الفنانة هند عبد الحليم عن كواليس لقائها بالزعيم عادل إمام، مؤكدة أن كلماته كانت من أهم اللحظات التي منحتها الثقة في مشوارها الفني.
استقبال عظيم للفنانة
وأضافت، خلال لقاء خاص ببرنامج «الستات ما يعرفوش يكدبوا» المذاع عبر قناة «سي بي سي»: «عادل إمام نجم كبير أوي ومهما قولت مش هكفي، واستقبلني استقبال عظيم عشان عارف إني قلقانة ومتوترة»، متابعة: «اتعلمت من الناس الكبيرة إن أهم حاجة الالتزام».
بداية التعامل مع عادل إمام
وأضافت: «عادل إمام قالي انتي عنيكي حلوة جدا وهتبقي حاجة كبيرة، وقالي انتي شاطرة، فطبعا دي شهادة خدتها، كنت طايرة من السعادة ومش مصدقة نفسي».
واستكملت: «وقت ما أحس إني مضايقة ومش في أحسن حالاتي بقعد أفتكر كلامه وأسترجع الحاجات دي».
كما كشفت عن طريقة اختيارها لأعمالها الفنية، قائلة: «ساعات برفض أدوار كتير لإني مش عايزة أكرر حاجات عملتها قبل كده، أنا بحب التمثيل والغناء».
تعيش الفنانة هند عبد الحليم، حالة النشاط الفني اللافت خلال الفترة الحالية، حيث قررت أن تقوم بخطوة مختلفة عن مجال التمثيل، وذلك بالدخول إلى عالم الغناء .
حيث أطلقت أغنية بعنوان "على فين"، أولى تجاربها في تقديم الأغاني المنفردة، الأغنية كلمات آية عاطف، وألحان عبد الرحمن رشدي، وتوزيع موسيقي، عيسى وأسود ونوڤو.. وتوزيع شركة "ديجيتال ساوند".
وصرحت هند عبد الحليم بقولها: سعيدة بدخولي مجال الغناء، إلى جانب التمثيل، والقرار ده كان بقالي كتير أوي مترددة إني أخده، وقررت أخيرًا إني أعمل الخطوة دى وأنزل أغنيتى، يا رب تعجب الناس كلها ويسمعوها.. خطوة مهمة جدًا فى حياتى.
وأضافت هند : اخترت أغنيتي الأولى "على فين"، بعد إعجابي بالكلمات واللحن، وهي تميل إلى الطابع الرومانسي البسيط، وحسيت إنها بتقدم دعوة للأمل والتفاؤل وحب الحياة، وأتمنى إعجاب الناس بيها، وعلى فكرة بشتغل دلوقتي على تقديم أغاني جديدة بشكل متواصل خلال الفترة الجاية، وبحضر لأغنية هتكون مفاجأة ، وهي من كلماتي وألحاني وتوزيع موسيقي هدز، والأغنية خفيفة إيقاعها سريع وشبابي، وبتناسب أجواء الصيف.
كلمات أغنية "على فين":.
انا وهو ما بينا سنين .. وعشرة وحب مش ساهلين ..
أنا لسة بشوف بعنيه .. حاجات ف الدنيا اجمل بيه ..
دايما حساها
ولو هفضل أنا أوصف فيه .. دي عايزلها سنين وسنين …
أنا و قلبي راهنا عليه ..ومرتحناش لناس تانيين ..
على فين .. رايحين .. مش فارقة انا قلبي ارتاح وهو معاك ..
دي سنين .. وسنين .. دورت عليك وما صدق قلبي لقاك ..
وصالحت الدنيا وحبيتها علشان وياك
ولو فاكر حبيبي زمان .. لينا ذكرى فـ كل مكان ..
بروحه بحس فيه بـ أمان .. محستهوش بقالي زمان ..
وحضنك ده اللي بهرب ليه .. وبطمن وبهدى أنا فيه ..
معاك قلبي مخافش عليه .. بقى براحته ومش قلقان ..
أدي الدنيا وأدي الأيام .. مخبية حاجات ليا ..
كنت بشوفها فـ الاحلام .. بقت دلوقتي حقيقية .
