سعاد صالح: لو دخل مجدي يعقوب النار يبقى ربنا ظلمه.. والجنة ليست للمسلمين فقط
قالت الدكتورة سعاد صالح إن ابنها متزوج من سيدة مسيحية، مؤكدة أن ذلك لم يسبب أي خلاف داخل الأسرة، مشيدة بأخلاق زوجة ابنها وطريقة تعاملها مع أبنائها.
جوزت ابني لمسيحية وأخلاقها قمة في المثالية
وقالت الدكتورة سعاد صالح، خلال لقاء مع الإعلامية أميرة بدر: «أنا جوزت ابني مسيحية، والرسول تزوج مسيحية، وزوجة ابني قمة في المثالية، في الأخلاق، وفي الأدب، خلفوا ولدين ما شاء الله، مسلمين، وأمهم معندهاش أي اعتراض، بالعكس، هي بتخليهم يروحوا مع باباهم يصلي، وباباهم بيحفظهم القرآن، ودخلتهم مدارس بتدرس اللغة العربية والدين».
ربنا مش هيظلم حد زي مجدي يعقوب
وتحدثت عن مصير غير المسلمين، قائلة: «عالم الغيب والشهادة عند ربنا، لكن أنا من خلال اجتهادي بقول: واحد زي مجدي يعقوب، واللي قدمه للفقراء المسلمين قبل غيرهم، معقول ربنا يظلمه ويدخله النار؟ لا، لو دخل النار يبقى ربنا ظلمه، وربنا عادل».
وأضافت: «كل واحد يعبد ربنا بالطريقة اللي هو شايفها، سواء كان مسيحي أو يهودي أو مسلم، وربنا بيقول في القرآن: ولو شاء ربك لجعل الناس أمة واحدة ولا يزالون مختلفين ولذلك خلقهم، يعني الاختلاف في الدين موجود، وربنا هو اللي هيحاسب الناس».
الجنة مش للمسلمين بس
وأكدت أن ما تقوله هو اجتهاد شخصي، مضيفة: «سواء كانوا مسلمين أو يهود أو مسيحيين، المؤمنين منهم هيدخلوا الجنة، الجنة مش للمسلمين فقط، نعم، كل من رضي الله عنه، وأطاع الله، وكان بيؤدي الأمانات ويعمل الخير».
وتابعت: «لكن أنا ما أقدرش أدخل في حساب ربنا، وعلم الغيب عنده، وده اجتهاد، وباب الاجتهاد مفتوح، وربنا لم يجعل بين العبد وبينه حجابا».
الصلاة في المسجد والكنيسة.. أي مكان ينفع للصلاة
كما أكدت أنها ترى أن الصلاة تجوز في أي مكان، وقالت: «صليت في المسجد، وصليت في الكنيسة، أي مكان أصلي فيه، لأن الرسول صلى الله عليه وسلم قال: جعلت لي الأرض مسجدا وطهورا، يعني أي مكان في الأرض ينفع للصلاة».
وأوضحت أن المقصود بـ«طهورا» هو جواز التيمم بتراب الأرض عند فقد الماء أو عدم القدرة على استخدامه، مثل المريض الذي يتضرر من الوضوء، مضيفة: «ربنا قال: فامسحوا بوجوهكم وأيديكم منه، وبكده يبقى الإنسان طاهرا».
العبادة مش الصلاة والصيام بس
واختتمت حديثها بالتأكيد على أن مفهوم العبادة في الإسلام أوسع من أركانه الأساسية، قائلة: «الصلاة، والزكاة، والصيام، والحج أركان أساسية، لكن كل فعل وكل قول يؤدي إلى رضا الله ورسوله فهو عبادة، وربنا قال في آخر سورة الحج: يا أيها الذين آمنوا اركعوا واسجدوا واعبدوا ربكم وافعلوا الخير لعلكم تفلحون، يعني ربنا وسع دائرة العبادة، وخلى فعل الخير كمان من أسباب الفلاح».
