يوسف بطرس غالي: ما زلت «ميكانيكي اقتصاد».. لكن بقيت أشيك وأغلى

أكد الدكتور يوسف بطرس غالي، وزير المالية الأسبق، أنه لا يزال يرى نفسه يحمل لقب «ميكانيكي الاقتصاد» الذي أطلقه على نفسه خلال فترة توليه وزارة المالية، مشيرا إلى أن طريقته في التفكير لم تتغير رغم انتقاله للعمل في القطاع الخاص.

اللي بيتولد ميكانيكي بيموت ميكانيكي

وقال، خلال لقائه في بودكاست «موعد مع لميس»، الذي تقدمه الإعلامية لميس الحديدي: «اللي بيتولد ميكانيكي بيموت ميكانيكي.. ما زلت ميكانيكي، لما ببص على حاجة ببص: ماشية إزاي؟ ممكن أصلحها إزاي؟ أو أخربها إزاي إذا كنت حابب.. فطبيعة الميكانيكي بتتولد ميكانيكي».

وردا على سؤال الإعلامية لميس الحديدي: «لسه ميكانيكي؟ ولا بقيت ميكانيكي شيك كده في نفسك؟»، أجاب مازحا: «ميكانيكي شيك وميكانيكي أغلى.. مع القطاع الخاص الميكانيكي بيبقى أغلى شوية».

القطاع الخاص أكسب

وعن الفارق بين العمل في الحكومة والقطاع الخاص، وأيهما يفضل، قال: «كل واحد وله مشاكله.. ما أقدرش أقول الشغل في الحكومة كان أظرف أو أوحش.. كل طريقة لها مشاكلها».

وخلال الحوار، علقت لميس الحديدي قائلة: «بس القطاع الخاص أكسب؟ والحكومة سلطة؟»، ليرد: «أيوه طبعا، القطاع الخاص أكسب، والحكومة سلطة، بس على حسب هتستخدميها إزاي، هتستخدميها عشان نطبل ونهيص وعشان شوية شعبية زائفة وبعدين نتكل على الله دي طريقة.. طريقة تانية هتستخدميها عشان تسيبي حاجة تفضل وراكي بعد ما تمشي دي طريقة تانية».