قصة نجاح ملهمة.. مروة عادل تكشف كيف أعادت اكتشاف موهبتها بعد 17 عام
قالت الفنانة التشكيلية مروة عادل خريجة كلية التجارة، إنها ظلت فترة طويلة متوقفة عن الرسم بسبب البيت والزواج والأولاد، مضيفة: «رجعت تاني أتواصل بعد حوالي 17 سنة، حصلي موقف خلاني أرجع أمارس تاني وكان عندي حد بيساعدني في البيت».
لحظة اكتشاف الموهبة
وأضافت خلال تقرير تلفزيوني عرضه برنامج «الستات ما يعرفوش يكدبوا»، المذاع على قناة «سي بي سي»: «كنت بشغبط في ورقة في اسكتش كده في البيت في ورقة وسيبتها واللي كانت بتساعدني في البيت اكتشفها وقالت مين رسم دا قولتلها أنا قالتلي انتي ازاي بتعرفي ترسمي كده ومش بترسمي».
نظرة وشها ورد فعلها واستغرابها
وتابعت: «نظرة وشها ورد فعلها واستغرابها إني بعرف أرسم خلاني أفكر إني ليه مش برسم، وهي إدتني فكرة إني أخد كورسات، يعني بقالي 6 سنين تقريبا باخد كورسات، كنت عايزه أعرف أكتر واتعلم أكتر».
الأولى في أكاديمية الفنون
وواصلت: «دخلت أكاديمية الفنون وخدت دبلومة نقد وتذوق فني والحمدلله طلعت الأولى طول السنتين دراسة، هناك كانوا بيشجعوني جدا وعندي ملكة الكتابة متميزة فيها، فبدأت الدكاترة تقولي لا متوقفيش كتابة لا كملي، لما دخلت أكاديمية الفنون دماغي اتغيرت وابتديت أدرس لأطفال الرسم وخدت دبلومة علم نفس الفنون».
طموحي إني أشارك في معارض خارج مصر
واختتمت: «طموحي إني أشارك في معارض برا مصر سواء في دول عربية أو أجنبية بحيث أتعرف على ثقافات أكتر وأتطور أكتر، ومن تجربتي عايزة أقول لكل أم مصرية لو عندك موهبة كملي فيها ودافعي عنها وشجعي نفسك، كل خطوة هتخطيها هتخليكي تقوي أكتر وهتكوني فرحانه ومبسوطة جوه نفسك».
