الفنانة هيدي كرم: ممكن أتجوز مرة تانية.. الحياة مبتقفش عند حتة معينة

كشفت الفنانة هيدي كرم أن قرار الانفصال كان من أصعب القرارات التي مرت بها، مؤكدة أنها لا تغلق الباب أمام الزواج مرة أخرى، لكنه ليس ضمن أولوياتها في الوقت الحالي.

وقالت هايدي كرم خلال لقاء في «إذاعة نجوم إف إم»: «لا أشعر بأن هناك اختيارا صعبا، ولكن في وقتها فكرة الانفصال كانت اختيارا صعبا»، وأضافت: «لا توجد ست تنفصل ويكون الاختيار بالنسبة لها سهلا، حتى لو كان اختيارها عن قناعة، فأرض الواقع مختلفة».

وتابعت: «ممكن أتجوز مرة تانية، أنا شايفة إن الحياة ما ينفعش تقف عند حتة معينة»، واستكملت: «في الوقت الحالي لا، مش لأني قافلة الباب، لكن عندي أولويات أهم وأكتر»، وتابعت: «لو ظهر شخص شاطر، ومتفاهم مع حياتي، ومحترم أولوياتي، ليه لأ؟».

اتجوزت في سن 18 سنة

وأضافت: «أنا اتجوزت وأنا عندي 18 سنة، وكان عن حب طبعا، وقعدت في الجوازة حوالي 11 سنة».

وتابعت: «بس وإنت بتكبري بتتغيري، طريقة تفكيرك بتتغير، وإنتوا الاتنين بتتغيروا، واللي كنتِ عايزاه بيتغير، واللي كنتِ متقبلاه ما بقيتيش متقبلاه، وإنتِ أصلًا بتبقي واحدة تانية».

وأكدت: «18 سنة زي طفلة برضو، فما أعتقدش إن ده السن المناسب، ومتهيألي إن في السن ده ما بيبقاش عندك الوعي الكافي إنك تاخدي قرار زي الجواز».