هيدي كرم: «تزوجت في سن 18 بعد قصة حب.. والزواج المبكر مش مناسب دلوقتي»

كشفت الفنانة هيدي كرم تفاصيل تجربتها مع الزواج المبكر، مؤكدة أن الظروف والأفكار تغيرت كثيرًا عما كانت عليه في الماضي، وأنها لا تنصح بالزواج في سن صغيرة كما حدث معها.

رأيها في البنات والأولاد دلوقتي

وقالت هيدي كرم خلال لقاء في «إذاعة نجوم إف إم»،: «أنا بحس دلوقتي الولاد والبنات منقسمين، فيه اللي بيحافظوا على نفسهم وشكلهم وبيلعبوا رياضة، وبيبعدوا عن كل حاجة ممكن تضرهم من مخدرات وسجاير وشرب، وفيه بنات عايزين يكون عندهم أسرة، وفيه بنات كل تركيزهم يبقى في الكارير، وفيه اللي ما عندهمش مانع يتجوزوا».

اتجوزت في سن 18 سنة

وأضافت: «أنا اتجوزت وأنا عندي 18 سنة، وكان عن حب طبعا، وقعدت في الجوازة حوالي 11 سنة».

وتابعت: «بس وإنت بتكبري بتتغيري، طريقة تفكيرك بتتغير، وإنتوا الاتنين بتتغيروا، واللي كنتِ عايزاه بيتغير، واللي كنتِ متقبلاه ما بقيتيش متقبلاه، وإنتِ أصلًا بتبقي واحدة تانية».

وأكدت: «18 سنة زي طفلة برضو، فما أعتقدش إن ده السن المناسب، ومتهيألي إن في السن ده ما بيبقاش عندك الوعي الكافي إنك تاخدي قرار زي الجواز».

الحياة بقت منفتحة جدا

واستكملت: «الحياة بقت منفتحة جدا، عندك اختيارات كتير، تقدري تسافري، تدرسي، تشتغلي، تعملي حاجات كتير، فكل حاجة بقت متاحة، إيه اللي يخلي البنت تتجوز بدري وهي الحياة قدامها مفتوحة؟».

وأضافت: «زمان كانت التربية إن لازم تتجوزي وتكوني أسرة، والحقي خلفي علشان لما تكبري يبقى عندك حد يسندك، إنما دلوقتي الناس بقت ليها حياة مختلفة».

الصحاب الحقيقيين رزق

وقالت: «الصحاب الحقيقيين هما الرزق الحقيقي في الحياة، هما أكتر ناس بيجروا عليكي، لكن الأولاد بيكبروا وكل واحد بيشوف حياته».

وقالت: «النهارده الطموحات بقت مختلفة، زمان كنا بنرضى بالقليل، لكن دلوقتي البنت عايزة تتجوز، وعايزة يبقى معاها فلوس، وعايزة يبقى معاها عربية، ولو ما لقيتش ده يتحقق قدامها، هتعمله لنفسها، التفكير كله اتغير».