«حتى لو بشوية مية».. تامر أمين يوجه مناشدة مؤثرة للمصريين بسبب موجة الحر

ناشد الإعلامي تامر أمين المواطنين بالتخفيف عن عمال الشوارع في ظل موجة الحر المرتفعة، قائلا: «الناس اللي بتشتغل في الجو دا وعمال الشوارع، اللي بياكلوا لقمتهم من عرق جبينهم تحت أشعة الشمس المباشرة طول فترات الصباح، زي الفلاح والمزارع والعامل والشيال والسقال، قلبي بيتقطع عليهم، غير اللي واقف قدام فرن درجة حرارته 100 مطلع صهد في وشك».

الناس دي محترمة وشقيانة

وأضاف، خلال تقديم برنامجه «آخر النهار»، المذاع على قناة «النهار»: «الناس دي محترمة وشقيانة تستاهل نقفلها تعظيم سلام، الناس دي نقدر نساعدها ازاي، أول حاجة فكرة المية الساقعة من خلال توزيع مية ساقعة، حتى لو بشوية مية نمسح على إيدهم كده». 

طلبين لأصحاب العمل

وتابع: «عندي طلبين لأصحاب العمل اللي عندهم منشآت، أول حاجة لو تعرف تأجزهم الساعة من 11 لـ 2 دي يبقى كتر خيرك، البنا أو الفواعلي تريحه التوقيت دا، لأن اللي نزل واتحوج ونزل يشتغل في الشغل دا يبقى أكيد محتاج وعايز يأكل عياله، خلي يوميته يومين لإن والله هيتردلك سواء في إتقان العامل لعمله لما يحس إنك مقدره، أو تعويض ربنا ليك». 

وقال الإعلامي تامر أمين، إن ما يحدث في أوروبا بسبب موجة الحر الشديدة يثير حالة من الدهشة، قائلاً: "بس إحنا بنسيح معنويا بنقول يعني أبيض ده درجة حرارة، بس الحقيقة إن الأخبار اللي جت لنا إنه أوروبا بتسيح فعليا مش معنويا، موجة الحر الشديدة اللي بتضرب القارة الأوروبية وتحديدا فرنسا أكتر بلد بتعاني، أنا مش فاهمها، هتقولوا لي يعني إيه مش فاهمها؟ أقول لكم مش فاهمها، لما أقول لك إنه الأخبار بتجي لنا إن في 1000 شخص، 1000 شخص في فرنسا خصوصا من كبار السن والعجائز توفوا بسبب موجة الحر الشديدة، مش عيوا، مش جالهم ضربة شمس، وفاة نتيجة موجة الحر الشديدة".

أوروبا مش واخدين على درجة الحرارة العالية

وأضاف تامر أمين، مقدم برنامج «آخر النهار» المذاع على قناة النهار: "طب حد هيقول لي يا تامر ماشي ما هم عجائز وكبار سن مش مستحملين، وهم غالبا في أوروبا كمان مش واخدين قوي على درجة الحرارة العالية دي، هقول لك ماشي هعديها.

طب الأخبار اللي بتيجي إنه في بعض الوسائل والأدوات اللي موجودة في الشوارع باظت وبتسيح، لدرجة إن عندنا بعض الصور عن إشارات المرور، عارفين إشارات المرور سايحة من الشمس، طب ما حد بقى يديني عقله، الحاجات دي بتسيح إزاي؟