منتهى الظلم .. كولر يواجه هجوم الأهلي بعد تاريخ من الإنجازات
استنكر الإعلامي كريم رمزي، هجوم جماهير الأهلي على مارسيل كولر عقب انتهاء مباراة فريقه أمام صن داونز، يوم الجمعة الماضية.
بداية كولر
وقال رمزي عبر حسابه الشخصي بموقع التواصل الاجتماعي "إكس": "يوم ٩/٩/٢٠٢٢ الأهلي أعلن التعاقد مع مارسيل كولر مدير فني للفريق، وقتها موسيماني كان سايب للأهلي نسخة سيئة جدا في كل البطولات اللي بيشارك فيها.. ومن بعده ظهور خافت جدا لسواريش".
وأضاف: "في الوقت ده كان جمهور الأهلي بيطالب برحيل حسين الشحات، وعلي معلول كبر، ومحمد هاني ناشئ، وكريم فؤاد طلع مقلب، وبيرسي تاو مش المحترف اللي تجيبه والأهلي مفيهوش مهاجمين، صفقات الأهلي الجديدة اللي استقبلت كولر في صيف ٢٠٢٢، كانت برونو سافيو وشادي حسين ومصطفى سعد ميسي".
إنجازات كولر
وتابع: "الشكل مكنش بيقول إن الأهلي ممكن يفوق بسرعة، ده غير إنه اللي كان متوقع وبشكل طبيعي إن كولر هياخد وقت ينسجم بما إنه أول مرة يدرب في إفريقيا والمنطقة العربية.. محدش واثق فيه وصفقات مكنتش سوبر ومتقدرش تقوم الفريق.. كولر راح اشتغل على اللي موجود.. عمل نسخة تاريخية من علي معلول قبل الإصابة.. خلى كريم فؤاد جناح رائع قبل الإصابة في وقت كان الناس بتسأل هو بيلعب باك رايت ولا باك ليفت".
وأكد: "محمد هاني بقى الظهير الأيمن الأساسي لمنتخب مصر.. ياسر إبراهيم راح المنتخب وكان أساسي قبل الإصابة.. بيرسي تاو كان أفضل لاعب داخل القارة، وبعده حسين الشحات.. محمد عبدالمنعم بقى مدافع عالمي، بعد ما كان مدافع واعد في الكرة المصرية. وفي عز أزمة الأهلي الهجومية على المستوى الفردي، جاله كهربا بعد ما كان مبيلعبش بقاله ٧ شهور وعنده كل المشاكل، وخلاه هداف الأهلي في إفريقيا".
جهود كولر
متابعًا عن إنجازاته: "كولر كسب بطولتين إفريقيا، واحتكر البطولات المحلية دوري وكاس وسوبر في سنتين ومكنش معاه أفضل فريق، أو بمعنى أدق فريق مش متكامل في ظروف صعبة فيها ضغط مباريات كتير، ونظام كرة محلية ميساعدش أي فريق على النجاح.. كولر كسر أرقام قياسية محلية وإفريقية، عملها أسطورة تدريب الأهلي مانويل جوزيه بلاعبين أكيد مهما كبر أسماءهم مش هيكونوا اللاعبين اللي كانوا مع جوزيه"
وأوضح: "أه صحيح كولر تراجع جدا في الموسم ده مع الأهلي وفقد السيطرة الفنية على الفريق جماعيا وفرديا، بس هو خسر من باتشوكا بضربات الترجيح.. خسر من الزمالك في السوبر الإفريقي بضربات الترجيح، وخسر فرصة النهائي الثالث على التوالي إفريقيا بهدف في الدقيقة ٩٠. كولر لم يسيء يوما لصحفي في مؤتمر، متكلمش مرة بغرور، مردش على إهانات جمهور، مكنش بيبرر دايما أي تعثر بالحكام".
منتهى الظلم
وأردف: "كولر رحل عن الأهلي أكيد، بس كولر عمل تاريخ عظيم جدا في سنتين ونص، ومدرب غيره في أي مكان آخر لو عمل ربع الأرقام دي في نفس المدة هيتعمله تمثال".
واختتم: "بكتب الكلام ده علشان حاسس إن اللي حصل مع كولر في مشهد الختام هو منتهى الظلم. الظلم اللي غالبا شفناه كلنا في حياتنا، إنك مهما تجتهد وتتعب وتنجح وتحقق انجازات، هيجي مديرك أو اللي مهتمين بيك ويلوموك بقسوة مع أول تعثر.. وكأنك معملتش حاجة، ومحدش هيحاسبك حتى معنويا على مجمل أعمالك.. مش هحط صورة كولر وهو خارج من الملعب قدام صن داونز علشان مش دي الصورة اللي هنفتكر بيها كولر".
