بركات يكشف كواليس مراهقته: زوغت من المدرسة وأكلت علقة
كشف محمد بركات نجم الأهلي السابق، عن كواليس طفولته، قائلا: «كنت بزوغ من المدرسة وأنا صيغر بس مش كتير هما مرتين بس.. أول مرة عدت عادي وتاني مرة اتقفشت».
وأضاف، خلال استضافته في بودكاست «فايق ورايق في المونديال» مع الإعلامي إبراهيم فايق: «زوغت وروحت الحديقة الدولية وفي واحد صديق أخويا شافني وقال لأخويا وبابا عرف وأكلت علقة سخنة.. العلقة دي كانت بالاشتراك مع والدتي.. كمان كنت حاسس إنهم بيعلوا على بعض يعني كل واحد عايز يضربني الضربة الأقوى لدجة إنهم نسيوا إن هما بيضربوني.. وأنا مكانش فارق معايا كنت بقول هصحى الصبح أبقى كويس».
وخلال الحقلة قال بركات: «أنا بقابل مشاكل كتير في الحياة علشان مش بعرف أكشر.. وناس كتير بتفتكر إني مش باخد المواضيع بجد علشان بضحك لكن ده مش حقيقي ممكن أكون بضحك بس بركز وباخد المواضيع بجد، أنا طول الوقت بضرب مثل بيا وبوائل جمعة إن ممكن الشخص يكون بيركز وبيضحك عادي وممكن شخص تاني يكون طول الوقت مكشرعلشان لو ضحك ممكن يفقد تركيه.. عادل كل واحد حسب طبيعته».
وتابع محمد بركات: «زمان كنت بحاول أضحك وائل جمعة وسيد معوض قبل الماتشات.. بس هما كانوا بيتجاهوا النظر ليا علشان بيخافوا يفقدوا تركيزهم».
كما تطرق الكابتن محمد بركات لفترة عمله مع الكابتن حسام البدري، المير الفني الأسبق للنادي الأهلي: «أنا كنت طول الوقت بحاول اتقي شر كابتن حسام لأنه مش بيحب الهزار في الشغل خالص، مع إنه خارج الشغل شخص كوميدي جدا جدا وبيضحك وبيعرف يقول إفيهات كمان».
وفي وقت سابق، كشف محمد بركات، نجم الأهلي ومنتخب مصر السابق، عن رؤيته الفنية لمواجهة منتخب مصر أمام بلجيكا، مؤكدًا أنه كان يفضل إجراء بعض التعديلات خلال أحداث المباراة.
كما أشاد بركات بالأداء الذي قدمه محمد صلاح خلال المباراة، مؤكدًا أن قائد المنتخب ظهر بمستوى جيد وكان من الأفضل استمراره داخل الملعب حتى الدقائق الأخيرة.
وأشار إلى أن صلاح شكل مصدر خطورة مستمر على دفاعات المنتخب البلجيكي وساهم بشكل واضح في الأداء الهجومي للفراعنة.
