راندا البحيري تكشف عن تاريخ إصابتها بالتسمم بعد تناولها منتجات بلبن

أجرت الفنانة راندا البحيري مداخلة هاتفية في برنامج حضرة المواطن المُذاع على قناة الحدث اليوم، لتكشف عن تفاصيل تعرضها للتسمم بعد تناولها منتجات بلبن تحديدًا في أبو ظبي.

راندا البحيري تكشف عن تاريخ إصابتها بالتسمم

وقد فجرت راندا البحيري مفاجأة حول موعد إصابتها، حيق قالت في المداخلة الهاتفية: “الموضوع ده كان من أسابيع .. بعد ما أكلت من مطعم بلبن .. كنت في الإمارات إمارة أبو ظبي .. كانت أول مرة في حياتي أكل من الحاجات دي .. بعد الأكل ب 8 ساعات .. اتنقلت إلي المستشفى وقاموا باللازم .. لأني كنت في حالة إعياء شديدة وجالي تسمم حاد .. وسخنت جدًا وكنت بترعش .. قالولي الحمدلله أننا لحقناكي لأن كان التسمم وصل للدم .. وفي فتحات في جسمي بدأت تطلع لون زي صديد كده .. الموضوع كان كبير جدًا .. شوفت الموضوع بعيني .. حد من شركة بلبن كان مكلمني قبل كده فكنت مسجلة الرقم .. كلمتها حكيتلها اللي حصل .. قولتلها أنا مش عندي تأمين صحي هنا .. شافت الرسالة ومردتش .. ودي حاجة سيئة جدًا .. خدت أدوية واتعلقلي محاليل وفضلت 15 يوم اتعافي .. ووصلت القاهرة وبدأت أمشي في الاجراءات .. وعرفت أنه تم التفتيش .. بس كل ده حصل قبل غلق محلاتهم هنا وقبل كل اللي حصل ده”.

تعليق راندا البحيري على واقعة التسمم

وعلقت الفنانة راندا البحيري أمس على ما يشكك فيما قالت عن إصابتها، حيث نشرت منشورًا عبر حسابها الرسمي على موقع التواصل الإجتماعي فيسبوك، وقالت: "الناس اللي بتكتب كومنتات من نوعية: هو دي منظر واحدة متسممة.. حضرتك ما أنا مش لازم أطلعلك وأنا معلقة محاليل وأنا برجع وأنا في حالة إعياء شديدة وبترعش.. أنا الحمدلله استنيت لما إجراء تم واتبعتلي بيه تقرير من هيئة أبو ظبي للزراعة والسلامة الغذائية.. واستنيت لما بقيت كويسة وبعدها اتكلمت عن واقعة بمستندات ومحاضر".

بينما ظهرت راندا في بث مباشر عبر حسابها على الفيسبوك للرد على تعليق أحد متابعيها القائل: “المسامح كريم”، لترد عليه قائلة: “حضرتك لو بنتك اللي اتسممت هتسامح؟.. وكانت بتموت قدامك هتسامح؟.. فكرة إنك توصل لمرحلة إنك عايز ترضي الكل.. من المستحيلات.. وأنا مش مهم بالنسبالي خالص إني أرضي الناس .. المهم ربنا راضي عني .. وأنا راضية عن أفعالي وشايفة إنها تناسب ديني وأخلاقي وتربيتي .. بس يا جماعة يعني لما كنت مش عارفة أعمل إيه كتبتولي لازم تاخدي حقك ومتسكتيش .. ولما حاولت أخد حقي .. الناس كتبالي ينفع كده .. وبوستات المصريين مع بعض في الغربة .. إيه علاقتها وعلاقة إني اتسممت وشوفت الموت بعيني .. وحصلي بلاوي .. اتعلقلي محاليل وروحت المستشفى بالإسعاف .. ليه اتهاون في حقي بالمنظر ده .. الكلام ده حصل بجد وتم التفتيش من كذا شهر مش دلوقتي بس .. لو الناس دي مكاني هيسعوا ورا حقهم”.