شيكابالا: وأنا صغير كنت ببوس رجلي الشمال وأقول دي الرجل الذهبية
كشف شيكابالا نجم الزمالك السابق، عن حبه الكبير لكرة القدم منذ طفولته، لافتا إلى أنه بدأ بلعب كرة القدم في الشارع مع أصدقائه، ومن ثم ذهب إلى مدرسة الموهوبين بأسوان.
وقال، خلال استضافته في بودكاست «فايق ورايق في المونديال»، مع الإعلامي إبراهيم فايق: «وأنا صغير كنت بلعب كورة في الشارع ومكانش حد من أهلي يعرف إن أنا موهوب لحد ما اخواتي شافوني واقتنعوا.. أنا كنت مقتنع بموهبتي جدا وأنا عندي 9 سنين كنت ببوس رجلي الشمال وأقول دي الرجل الذهبية، وبعدين دخلت مدرسة الموهوبين في أسوان.. بعدين انتقلت لمدرسة الموهوبين في القاهرة».
وأضاف: «كان في هناك الدكتور إبراهيم المفتي راجل أهلاوي جدا والدكتور أشرف جابر زملكاوي جدا واحد قالي هتروح الأهلي وواحد قالي هتروح الزمالك.. والدكتور إبراهيم المفتي كان عامل كتاب كدا عن الموهوبين وكان حاطط صورتي في أول صفحة».
وتابع: «وقتها كان وزير الشباب والرياضة وقتها الدكتور عبدالمنعم عمارة.. قالوا كلام عني وهو عرف وجابني المكتب وجابلي كورة وأنا فضلت ألعب بيها قالهم ده هيروح الإسماعيلي.. لكن الأقرب ليا علشان أنا من أسوان كان مدرسة القاهرة وقعدت فيها بقا».
وأشار إلى صعوبة الحياة في مدرسة داخلية وهو في العاشرة من عمرة، مضيفا: «كل الناس كانت بتروح بيتها الخميس والجمعة بس أنا لا علشان من أسوان.. الموضوع كان صعب لكني كنت حاسس إن نقلة العائلة هتكون بسببي».
وخلال الحلقة، كشف محمود عبدالرازق شيكابالا نجم نادي الزمالك السابق، عن سبب ابتعاده عن اللقاءات الإعلامية، قائلاً: «أنا كنت بشوف ناس بتطلع تتكلم وتقول عني حاجات مش بعملها وناس بتحلف كمان علشان كدا مكنتش بحب الظهور الإعلامي، لأنك ممكن تطلع في ظهور إعلامي مع حد عايز ياخد منك كلام تخبط بيه في ناس تانية».
وأضاف: «ناس كتير فكرت إني لما اطلع هخبط في النادي الأهلي مثلا.. لكن أنا عمري ما أعمل ده أنا بتكلم في الكورة بس».
