مدحت نافع: حتى العشوائيات لا يمكن العيش فيها بـ10 آلاف جنيه شهريا

سألت الإعلامية أميرة بدر الدكترو مدحت نافع الخبير الاقتصادي وعضو ومنسق لجنة الاقتصاد الكلي بالمجلس الاستشاري لرئيس الوزراء: «لو مرتبك 10 آلاف جنيه إزاي تصرف على بيتك؟».

وأجاب ناف، خلال استضافته في بودكاست «مع أميرة بدر»: «مستحيل حد يقدر يصرف على بيته بـ 10 آلاف جنيه.. لذلك في ناس بتتحايل على المعيشة بإنها تشتغل أكثر من شغلانه لأن الـ 10 لوحدهم لا يمكن يعيشوا بني أدم عيشة كويسة أدمية حافظة لكرامته».

وأضاف: «لو افترضنا 2000 إيجار مع إن الرقم مش موجود بس لو هنقول عشوائيات.. هنقول مثلا أكل وشرب بس بـ 5000 جنيه ومثلا لو هنتعالج لكنا أنا وأسرتي بـ 1000.. هدفع مواصلات وكهرباء وغاز ومياه وهجيب ملابس وتعليم منين.. يعني الحد الأدنى للأجور أصلا يكون رقم أقدر أطلع منه مبلغ ادخار قبل ما أقسم الفلوس على الإلتزامات أصلا لأن لازم ندخر».

وأكد أن الادخار هام للغاية، لافتا إلى أن أحد أزمات التمويل الاستهلاكي هي دفع الناس للصرف بشكل مبالغ فيه.

وتابع: «لازم من الادخار ده أعمل صندوق يكفي من 3لـ 6 شهور علشان الموظف وارد يسيب شغله.. المبلغ ده مش لسفر ولا رفاهية لا ده علشان لو حصل ظرف طارئ».

وأردف: «أنا ضد كلمة حد أدنى للأجور.. لكن أنا شايف إن السوق الصحي لازم يوفر على الأقل مثلا 20 آلف للفرد والست لازم تشتغل.. ما زلنا نسبة عمل المرأة وفق الإحصائيات الرسمية قل بعد كورونا.. يعني نسبة البطالة الـ 6.5% دي منها حوالي 2 مليون ست خرجوا عن العمل.. أنا متأكد إن في سيدات ممكن تكون بتشتغل في شغلانات خارج الإحصائيات».

وخلال الحلقة، قال مدحت نافع الخبير الاقتصادي وعضو ومنسق لجنة الاقتصاد الكلي بالمجلس الاستشاري لرئيس الوزراء: «إحنا في مصر ماشيين على الطريق الصحيح وفي تحسن لكن بشكل بطيء جدا أكثر من اللازم.. والمواطن غير قادر على الشعور به».

تحسن بطيء

وتابع: «محدش يقدر يقول أنا هتحسن لكن في الأجل البعيد محدش بيقول هنتحسن وأبقى كويس في 2050.. محدش هيكون مهتم بالرسالة دي».