طليقة مسلم تهاجمه : ماشوفتش فلوس منك لابنك بقالك سنة
كشفت ضحى عبده طليقة مطرب المهرجانات مسلم عن حقيقة حصولها على أموال ابنهما ، وذلك بعد تداول أنباء تفيد بحصولها الأموال ، معبرة عن حيرتها في كيفية سفر مسلم ومروره من المطار على الرغم من وجود حكم قضائي عليه .
وقالت طليقة مسلم في فيديو نشرته عبر صفحتها الرسمية على موقع التواصل الاجتماعي انستجرام : أنا معايا حكم من المحكمة ٦ شهور ومينفعش إن مسلم يسافر غير لما الحكم يتنفذ ويدفع المبلغ المطلوب ، بس أنا من حقي اسأل انت ازاي عديت من المطار وأنت عليك حكم وأنا مخدتش فلوسي علشان في ناس بتقول ان أخدت الفلوس .
وأضافت : أنا مستلمتش فلوس ابني .. محدش يقول كلام مش حقيقي يا جماعة ، أنا لو خدت فلوس ابني هطلع أقول زي ما اتكلمت أول مرة لما كنت بتكلم عن عدم دفع النفقة
واختتمت : أنا معايا حكم ومش هتنازل لأن مفيش حاجة مخلياني مطمنة علشان كل الكلام كذب من طليقي .
وفي سياق متصل كانت قد علقت ضحى عبده، طليقة مطرب المهرجانات مسلم على الحكم بحبسه لمدة 6 أشهر مع الشغل، وكفالة 3 آلاف جنيه لإيقاف تنفيذ العقوبة، وذلك في القضية المقامة ضده من قبلها، والتي اتهمته فيها بالتبديد.
وكتبت عبر إنستجرام مؤخرًا : “من فترة كنت فقدت الأمل إني آخد حقي وحق ابني من أب للأسف لقب أب لا ينطبق عليه.. رمى ابنه ومبيسألش عليه وطبعًا لأنه انشغل بشغله وأطماعه والشهرة.. مفرقش معاه لا صلة رحم ولا طفل كل ذنبه إني اخطأت في اختيار أب ليه ولكن هنقول إيه ده نصيب”.
وأضافت: “لأن الحمدلله وبعد فترة من البهدلة والجري ورا حق ابني وطبعا بعد ربنا الفضل للأستاذ واليد أبوبكر المحامي إلى بعد ربنا كان له الفضل أنه يرجع حق ابني تمكنت من الحصول على حكم بحبس طليقي وده لأنه ممتنع عن سداد نفقه ابنه وبيتهرب منها.. وطبعا مش هنسي اشكر وزارة الداخلية لأنها متاخرتش في ادراج الحكم عليه وبدءو في التحريات عن محل إقامته لتنفيذ الحكم.. وأخيرا أحب أقول انه لايضيع حق وراءه مطالب”.
