عايز حق أختي.. أول تعليق من شقيق هدير بائعة الشاي ضحية حادثة الدهس

كشف شقيق هدير بائعة الشاي عن تفاصيل هامة حول سائق السيارة التي صدمت هدير، مؤكدا أن جميع الشهود على الحادث أكدوا أن الفتاة هي التي ارتكبت الحادث وليس الولد الذي ادعى أنه الفاعل.

وقال، خلال تصريحات خاصة لـ نيوز رووم:  «أنا وقت الحادث اتصلت بيها لقيت ناس بترد عليا وسألوني أنت تقربلها إيه قلتلهم أخوها قالولي انزل هي مخبوطة في الشارع ولما نزلت لقيتها ماتت والناس أكدولي إن اللي خبطها البنت اللي كانت بتسوق وكمان صديقة أختي اللي اتخبطت معاها قالت كدا لكن أنا معرفش علشان مظلمش حد، بس كل الناس اللي كانوا واقفين قالوا كدا وأنا عايز حق أختي سواء البنت أو الولد.. وأنا أختي عندها 29 سنة أكبر مني بـ4 سنين وهي مكملتش شهر في الشغل ده».

وفي سياق آخر، كشف كنزي صديقة بائعة الشاي عن اللحظات الأخيرة في حياة صديقتها، قائلة:«كنا واقفين على شغلنا عادي.. هدير بنت محترمة جدا وفي حالها وكانت بتنزل تشتغل علشان تساعد أهلها في المصاريف.. فجأة لقيت عربية جاية بسرعة كبيرة جدا وفجأة لقيت أنا في ناحية وهدير في ناحية».

وأضافت، خلال مداخلة هاتفية لها في برنامج «اليوم هنا القاهرة» المذاع عبر شاشة مودرن إم تي آي، مع الإعلامية فاتن عبدالمعبود: «أول ما قمت من الخبطة لقيت إيد هدير في مكان ورجلها في مكان والبت والولد منزلوش من العربية غير بعيد عن الموقع.. الناس اللي نزلوهم».

وتابعت: «رفرف العربية بتاعهم كان لازق في العربية بتاعتنا جسم هدير كان لازق.. حرفيا جلدها كان في العربية.. قبل الحادث كانت لسا بتكلمني عن خطيبها وإن ربنا حقق لها حلمها.. كانت بتحلم بحياة ملحقتش تعيشها».

وأشارت إلى أنها أصيبت بجزع وكدمات في مناطق متفرقة من جسدها.

ووجهت كنزي رسالة لكل أولياء الأمور: «راعوا ربنا في ولادكم وفي الناس متسبوش أولادكم يسوقوا عربيات زي كدا.. مينفعش طفل 15 سنة ياخد عربية ويسوق بالمنظر ده وفي لحظة ينهي حياة بني آدمة نازلة تاكل عيش ده ميرضيش ربنا.. أنت علشان مدلع ابنك بيدوس على الناس».