يوسف عابدين ينصح الشباب: متستعجلش في دخول الإعلام علشان متخسرش نفسك
وجه الإعلامي يوسف عابدين رسالة هامة للموهوبين الذين يريدوا الالتحاق بالعمل الإعلامي، قائلا: «الموهبة حاجة اساسية جدا لو مش موجودة فيك متحاولش».
وأضاف، خلال تصريحات خاصة لـ نيوز رووم: «متستعجلش.. كل الشباب دلوقتي مستعجلين يظهروا على الشاشة محدش عايز يأهل نفسه.. حتى أنت لو مؤهل وعندك اللغة والموهبة لازم تشتغل على نفسك بطريقة تانية لأن الإعلام مسؤولية مش مجرد ظهور أو يتقال عليا مذيع ولا مراسل».
وتابع عابدين: «لازم تأهل نفسك كويس جدا وتشتغل على اللغة والثقافة.. في منافذ إعلامية كتير بتفتح وتدي فرصة لناس كتير بس لازم أنت تكون جاهز ومؤهل وعارف إنها مسؤلية وأمانة ولو منجحتش فيها أنت الخسران.. ناس كتير ظهروا على الشاشة وهما غير مؤهلين ومتخيلين إنهم ناجحين وخسوا نفسهم، لازم تكون مؤهل».
كما كشف الإعلامي يوسف عابدين عن سر تفضيلة للبرامج المباشرة، قائلا: «التسجيل مفيهوش ادرينالين خالص أنا بفضل البرامج المباشرة مش المسجلة خالص».
وأضاف: «أحيانا بنضطر إننا نسجل مثلا فقرة أو حاجة خارجية بحاول وقتها أخدها وان شوت يعني اللي بيطلع مني أول مرة بيكون هو ده بيكون إحساسي طلع لو حاولت أعيد كل شوية هفقد الروح.. أنا بعشق الهوا».
وتابع: «المشاهد الوعي اللي إحنا بنشتغل علشان نرفع وننمي الوعي عنده ده أذكى مما تتخيل وبيشعر إذا كان المذيع متفاعل معاه وصادق ولا لا».
وأشار يوسف عابدين إلى أن الإعلام الحقيقي يعمل على تعميق الوعي لدى المشاهد وليس تسطيحة وجعله يصب اهتمامه على الترندات والمشاهدات.
وفي وقت سابق، أكد الإعلامي يوسف عابدين، مقدم برنامج "صباح الخير يا مصر"، أنه شاهد فيلم "برشامة" ولم يضحك على الإطلاق، مشيرا إلى أنه حاول كمشاهد البحث عن رسالة داخل العمل ليخرج بها ويكتفي بها، وموضحا أن الرسالة التي خرج بها هي "الجهل في الدين حتى بالقدر الذي يقيم الحياة من البعض وتطويعه لتحقيق أي غرض لدرجة الشيء وعكسه"، لافتا إلى أن هذا الأمر بات موجود في كل مكان.
