أول ظهور.. ولية أمر تكشف تفاصيل أزمة ابنتها داخل مدرسة دولية

في أول ظهور لها.. السيدة صاحبة الاستغاثة من مدرسة كمبريدج مصر الدولية تكشف التفاصيل صادمة عن ما يحدث في المدرسة، حيث قالت: « في البداية أنا طول الوقت بسمع مشاكل في المدرسة لكن كنت بتجاهل طالما بنتي مش فيها.. وأنا بنتي مكانش ليها أي مشكلة مع طالب ولا جالها استدعاء ولي أمر وسلوكها كويس».

وكشفت تفاصيل أول واقعة عندما كانت في أحد الرحلات المدرسية، خلال تصريحات خاصة لـ نيوز رووم، قائلة: «بنتي طلعت رحلة للفيوم في شهر 12 وفي الرحلة بتحجز مكان ليها في الباص.. في مدرسة قالتلها قومي من مكانك علشان تقعد ابن زميل ليها والبنت رفضت وقالت ده مكاني أنا جيت الأول وبدأ يكون في مشادة وتجبها من هدومها وهي البنت ساكته مش بترد وبتبص بس لصحبتها وقالتلها إيه الهبل اللي بيحصل ده فجأة لقت اقلام على وشها بايدها الاتنين وكل زمايلها حاولوا يدافعوا عن البنت».

وأضافت: «المدرسين بعدها أخدوا من بنتي الموبايل علشان متبلغنيش وقعدوها على جنب لوحدها وممنوعة من الأكل واتفاجئت من زميلاتها  وحاولت أوصل لبنتي وهي انهارت وقالتلي تعالي خديني.. بعدها تواصلت مع الإدارة وبلغتهم وقولتلهم عايزة بنتي وبعد نص ساعة في مدرسة كلمتني وقالتلي أنا هحقق في الموضوع وبعدين قالتلي المدرسة صالحتها والموضوع خلاص وجتلها أكل وأكلتها».

تحرير محضر 

وأردفت: «لما كلمت مديرة المرحلة الإعدادية قالتلي هو كدا ودي مش أول واقعة يكون ده ردها.. بعدها عملت محضر في القسم بضرب بنتي وحاولت تتواصل معايا واحدة من هناك طلبت تحل الموضوع ودخل وسيط في النص والموضوع نام خالص».

وأوضحت: «من بعد الواقعة البنت نفسيتها تعبانة جدا لكن حاولت أخلي البنت تروح وأول يوم نزلت فيه السلسة اتشدت من رقبته.. وروحت استلمها رفضوا وكتبوني ورقة إنها متجيش بسلسلة تاني وكتبوني إقرار بكدا».

وأكدت أنها بعد الإعلان عن ما حدث مع ابنتها تلقت كم هائل من الرسائل من أشخاص كثيرين حول وقائع مشابهة لما حدث مع ابنتها.

وتابعت: «حصل سب وقذف ليا من مديرة المرحلة الإعدادية لما روحت أطلب السلسلة بتاعة بنتي وعايزاني أخدها بعد اسبوع ودي دهب مش عايزة اسيبها ومن حقي كولية أمر أصلا استلمها ولما استلمتها لقيتهم مبوظين القفل بتاعها».

واستطردت: «أنا هجيب فيديوهات من المدرسة تأكد كلامي وطالبة تحقيق ووضع المدرسة تحت رقابة وتفجر مفاجآة من امبارح قفلوا الصفحات والجروبات وبيعملوا ريبورت على اي حاجة تهاجمهم.. لو ليكم حق بتختفوا ليه؟؟».

وعن منع ابنتها من حضور حفل تخرجها من المرحلة الإعدادية، قالت: «بنتي دفعت فلوس الحلفة وبعد يويمن رجعولها الفلوس وقالولها مس ألاء قالت لا انت مش هتحضري.. روحت بنفسي حاولت أفهم المشكلة وكتبت طلب علشان تحضر ومحدش رد وأنا تواصلت معاهم وشخص قالي للأسف الطلب اترفض قولتله عايزة صورة الرفض قالي مش مسموح أطلع حضرتك صورة ولا بالقبول ولا الرفض.. وهما بينكروا كل حاجة لكن أنا بسجلهم صوت وصورة وده طبيعي علشان أثبت حقي»

وتابعت: «مديرة المرحلة الإعدادية قالتلي أنت عايزاها تيجي ليه أنت اصلا رفضانا ومش بتخلي البنت تحضر.. ووضحتلهم إنها مش بتيجي علشان نفسيتها بعد واقعة الضرب لأنها اتضربت قدام ولاد وبنات وبعدها أخدوا منها السلسلة من رقبتها والمدرسة اللي ضربتها بتتريق عليها كل شوية وكل ده تاعب نفسية بنتي.. وبعدين رجعوا قالولي أصل أنت مش معانا ومش مكمله.. طب إزاي بتبعتولي أدفع مصاريف الباص وكمان أكمل مصاريف وورق تقديم الثانوي».

وانتقدت طرق حل الأخصائيين النفسيين للمشاكل بين الطلاب، قائلة: «ده هما مش بيحلوا المشاكل بين الأولاد ده بيشتموهم وبيتعبوا نفسية الطفل جدا».