نادر نور: اختفيت فترة بسبب ظروف شخصية والبوست كان مش موجه لشخص محدد
كشف الملحن نادر نور عن الجدل الذي حدث لال الفترة الماضية: «أنا حصلي ظروف شخصية بعدتني وده طبيعي وأنا مش بعرف أفصل بين الشغل والحياة.. ومحاولات الرجوع كانت عايزة مجهود كأني ببدأ من الصفر.. وبدأت من 2021 أحضر واتثقف وبدأت أخر 2022 أخبط على الأبواب وأحيانا كان في استجابة وأحيانا لا»
وأضاف، خلال استضافته في برنامج «كلام الناس» مع الإعلامية ياسمين عز المذاع عبر شاشة ام بي سي مصر: «في ناس اشتغلنا قبل كدا ومكانش في رد فعل.. وأنا معنديش عقدة العمل مع النجوم أنا اشتغلت مع شباب كتير جدا.. لكني حاولت اخبط على أبواب علشان أرجع لكن في ناس ظهرت واختفت وممكن نتقابل صدف ويقولولي كلمنا وبعدين مفيش استجابة.. هي ظروف وأنا مش زعلان من حد، لكن فين حق الرد مهم أنا مش ليا اسم مش شرط النجم ينفذ الأغنية».
موضوع رامي صبري
وتابع: «في ناس حاليا ببعتلهم مش بترد الناس دي كان أغانيا مكسرة الدنيا وهما مكانوش طلعوا لكن في ناس بترد يعني مرة محمود العسيلي رد وقالي مش شبهي وأنا احترمته جدا جدا، أما موضوع رامي صبري جه صدفه ومكانش هو المقصود خالص»
وواصل: « إحنا أه لازم نساعد المواهب الجديدة وأنا بحاول أعمل ده.. لكن حقيقي أنا في المرحلة دي مش قادر أعمل ده خالص».
وفي وقت سابق، نفى الملحن نادر نور وجود خلاف مع المطرب رامي صبري، بعد تصريحات الأخيرة التي أشار من خلالها رامي إلى عدم رده على الملحنين بسبب عدم التجديد، وربط الكثيرون حديثه بـ نادر، بعدما أكد الملحن معاناته من قلة العمل في الفترة الأخيرة.
وشارك نادر نور عبر حسابه الشخصي على فيسبوك "سكرين شوت" لمحادثة بينه وبين رامي صبري على واتساب، حيث كتب رامي لـ نادر : "صحیت النهارده لقيت الاستوري بتاعتي ملمسة عليك معرفش إزاي وليه ؟، بس ببعتلك أقولك لأنه يهمني تفهم، أكيد كلامي مش عليك أبدًا ولا يخصك أبدًا، أنا بتكلم بشكل عام، بس هي شكلها جت فيك من غير قصد".
