أمير المصري: دوري في رمضان مبروك كان كله ارتجال.. وعمر الشريف فتح لي الباب

كشف الفنان أمير المصري، عن بداياته في عالم التمثيل، والتي انطلقت من لقاء مع النجم العالمي الراحل عمر الشريف، قائلا:  «أنا الأول اتعرفت عليه علشان كنت بمثل في المسرح وعملت شكسبير وهو كان عمل نفس الدور وبالصدفة اتعرف على والدي في اجتماع ووالدي عرفني عليه.. ووقتها قعدت معاه في الفندق تقريبا ساعتين نتكلم عن المسرح والتمثيل وقالي علشان تنجح زيي لازم تكون محظوظ».

نصحني إني أصنع حظي في التمثيل

وأضاف، خلال استضافته في بودكاست فايق ورايق مع الإعلامي إبراهيم فايق: «وكمان نصحني إني أصنع حظي لأن المجال ده مهما كنت أشطر واحد فيه مش شرط تكون أنجح واحد لازم تتعلم تعمل حظك».

روحت العرض الخاص مكان عمر الشريف

وأردف: «أنا كنت في فرنسا وكان في عرض خاص لفيلم حسن ومرقص في فرنسا والنجم عمر الشريف مكانش عايز يروح وقالي روح مكاني.. وروحت بالعربية اللي كانت المفروض توديه وكل المصورين منتظرين عمر الشريف وأول ما شافوني قالوا مين ده أصلا؟ وأنا اتكسفت أقعد على الكرسي بتاعه طبعا».

دور كامل بلا سيناريو

وتابع: «هناك اتعرفت على الكاتب يوسف معاطي مؤلف حسن ومرقص ورمضان مبروك أبو العلمين.. وهو عرض عليا دور في فيلم رمضان مبروك وقالي الدور شبهك جدا وعملت تست كاميرا لدور مش مكتوب أصلا.. وبعدها بكام يوم أستاذ وائل إحسان كلمني وقالي إني هلعب دور رمزي وقالي إنسى الورق يلا إحنا هنلعب وأول مشهد كان وأنا في الفصل برقص وكان من غير أي اسكريبت».

واستكمل: «الدور كله كان من غير اسكريبت وكان ارتجال هو بس المخرج كان بيقولي الهدف من المشهد كذا وأنا برتجل.. وأستاذ محمد هنيدي بيحب الارتجال جدا وعمري ما قابلت ممثل زيه في الموضوع ده».

وفي سياق الحلقة، كشف الفنان العالمي أمير المصري عن كواليس دراسته، مؤكدا أنه كان طالبا محبا للرياضيات بشكل كبير جدا على عكس العلوم، قائلا: «أنا كنت بحب الـ MATHS جدا لكن كنت فاشل في الـ SCIENCE جدا».

الدرجات الدراسية ليست مقياس للنجاح في الحياة

وأضاف: «مش شرط الشخص يكون شاطر في الدراسة علشان يكون شاطر في حياته.. في ناس قدرت تنجح وتحقق ذاتها في مجالات تانية».