منى هلا تهاجم النظام الذكوري وكارهي النساء: "الستات مش بتنفسن على بعضها"
خرجت الفنانة منى هلا ، عن صمتها لتعترض بشدة على النظام الذكوري، أو ما يُعرف حديثًا بنظام كارهي النساء، وذلك من خلال مقطع فيديو عبر حسابها الرسمي على موقع تبادل الصور والفيديوهات إنستجرام.
منى هلا تهاجم نظرية “نفسنة الستات”
حيث قالت منى هلا معلقة: “في نظرية من ساعة ما كبرنا وأحنا بنسمعها، وأعتقد اللي خلق النظرية دي هو النظام البطريركي الأبوي الذكوري المتحكم اللي أثبت فشله في كل حتة في العالم، الناس بتحاول تبعد عنه لأنه نظام بيتآكل، كله عنف وغل وشر وحاجة مقرفة، النظرية دي بتقول أن الستات بتنفسن على بعضها والستات بتكره بضها، أنا الحقيقة طلعت في بيت كله نساء متعاونات جدًا، جدتي الله يرحمها في أواخر أيامها اللي شالها أخواتها وبناتها، وخالاتي تعبوا في آخر أيامهم اللي شالهم أنا وأخواتي وبنات خالي”.
واستكملت منى هلا حديثها: “أنا دلوقتي بتمرت في جيم كله ستات وطاقتهم زي العسل، ولطاف وحلوين ولما تشوف حاجة حلوة أنتي لابساها تقولك، طول عمري أصدقائي الستات ناس جدعة جدًا، لو اتصلت بيهم في أي وقت وقولتلهم أني في محنة بيفتحولي دراعاتهم وبيتهم، حتى الستات اللي اشتغلت معاهمخ سواء منتجات ومخرجات كاتبات وممثلات، عمري ما شوفت الشر والغل من الستات أبدًا، أرجوكم بطلوا تفكروا بالنظريات المتخلفة دي، وتعمموها لأن في ستات بتدم النظريات دي، استخدموا عقلكم شوية، بعتز جدًا بصداقات الستات، وفخورة أني اتولدت ست”.
تفاصيل إصابة منى هلا بقدميها
وقد ظهرت الفنانة منى هلا مؤخرًا وهي متجبسة بسبب إصابة في قدمها، وذلك من خلال مقطع فيديو عبر حسابها الرسمي على موقع تبادل الصور والفيديوهات إنستجرام.
وأوضحت منى هلا تفاصيل عن إصابتها في تصريحات خاصة لـ موقع نيوز رووم، حيث قالت: "الإصابة من فترة كبيرة وكان المفروض أرتاح عشان تخف، ولكن أنا كان عندي بروفات مسرح وتصوير وحاجات كتير فمكنتش بهدا في البيت كنت بنزل وباجي على نفسي، لحد ما لاقيت رجلي تعبت خالص ومش قادرة أمشي عليها وروحت للدكتور وقالي لازم أجبسها وافضل قاعدة في البيت 21 يوم".
