بعد ظهورها بالجبس.. تفاصيل إصابة منى هلا بقدميها|خاص
ظهرت الفنانة منى هلا مساء أمس وهي متجبسة بسبب إصابة في قدمها، وذلك من خلال مقطع فيديو عبر حسابها الرسمي على موقع تبادل الصور والفيديوهات إنستجرام.
تفاصيل إصابة منى هلا بقدميها
وأوضحت منى هلا تفاصيل عن إصابتها في تصريحات خاصة لـ موقع نيوز رووم، حيث قالت: "الإصابة من فترة كبيرة وكان المفروض أرتاح عشان تخف، ولكن أنا كان عندي بروفات مسرح وتصوير وحاجات كتير فمكنتش بهدا في البيت كنت بنزل وباجي على نفسي، لحد ما لاقيت رجلي تعبت خالص ومش قادرة أمشي عليها وروحت للدكتور وقالي لازم أجبسها وافضل قاعدة في البيت 21 يوم".
“نصائح للمجبسين”
وقدمت منى هلا نصائح لمن يمر بنفس ظرفها الصحي، حيث قالت: “الجبس أكتر شئ ممل فى الحياة ، مقترحات للمجبسين عشان ما يعملوش حاجة فى نفسهم من الملل، أولا العياط هيبقى جزء أساسى من يومك عادى تعامل معاه بشكل طبيعى، ثانيا لازم تشغل وقتك بأى حاجة مفيدة عشان لو عايش لوحدك ممكن يجيلك افكار مش تمام، ثالثا خلى عندك أرقام للطوارئ و عرف حد من المقربين و اتكلم معاهن بصراحة عن مشاعرك، رابعا أسمع لجسمك لإن غالبا هيدوك أدوية كتير ممكن تنام بسببها أحيانا عشرين ساعة فى اليوم أسمع جسمك و لا تشعر بالذنب إنك بتضيع وقت أبدا، خامسا كل كويس جداااااااااا و أستنى بنضافتك الشخصية لإن دى بتفرق فى النفسية، سادسا مارس هواياتك المفضلة و حاول تعمل كل الحاجات اللى كنت مأجلها زى القراية ، الكتابة ، الفرجة على أفلام و مسلسلات ، الخياطة ، و هكذا، سابعا خلى علاقتك الإجتماعية مع الناس اللى بتحبهم قوية فى الوقت ده و بلاش تقعد لوحدك كتير عشان دماغك متتسلوحش فى افكار سودوية، لو حد عنده افكار تانية يبعتلى ، خلوا بالكم من نفسكم و صحتكم ، و بلاش تضغطوا على أى إصابة عشان ما تتحطوش فى الجبس زيى”.
سبب إصابة منى هلا
وعن سبب الإصابة، أوضحت منى هلا معلقة: “أنا كان عندى الإصابة دى من سنتين تقريبا و لظروف شخصية و ظروف عمل خارجة عن إرادتى كملت شغل و أنا رابطة رجلى لإن مكنتش حاسة بالألم من المسكنات لكن بعدها الموضوع باظ و الدكتور خلانى فى الجبس، و بعدها علاج طبيعى فترة طويلة بس الحمد لله خفيت مع الوقت و بقيت كويسة، أحيانا الإصابات اللى ممكن نستهون بيها بتقلب خلوا بالكم ، أتمنى الشفاء لكل المرضى و لو حد متجبس أتمنى يخف بسرعة و يرجع يمشى طبيعى تانى”.
