ياسمين عز: تخنتي يا شيماء ولو حوشتي فلوس الوجبات هتبني بيت

قال الإعلامية ياسمين عز: «نصيحة ليكي يا شيماء هتعملي إيه لما الطقس بيكون كده.. حاليا إحنا خلاص داخلين على الصيف وودعنا الشتاء الحزين اللي تخنت فيه 15 كيلو حاليا هتنزلي الصيفي هتيجي تلبسي اللبس تلاقيه كش لكن هو مكشش ولا حاجة والدولاب معملش حاجة للهدوم أنت اللي تخنتي الهدوم مكشتش».

وأضافت، خلال حلقة اليوم من برنامج «كلام الناس» المذاع عبر شاشة ام بي سي مصر: «الحل بقا يا تخسي ودي من سبع المستحيلات لأنك بتعشقي الأكل أو إن أنت تطلعيه لله تشحتيه وتشتري هدوم جديدة… لو معكيش فلوس يبقى تخسي ولا أنت معاكي فلوس للأكل ده كان ممكن تبني بيت لو كنتي حوشتي فلوس الأكل.. حوشي علشان تقدري تلبسي الهدوم الصيفية الكشفة للوزن لأن في الشتاء مش بيبان وحاليا هتتفاجئي إن كل الطبقات بانت وهنشوفها كلنا».

وفي وقت سابق، علقت الإعلامية ياسمين عز، على واقعة قطع الكهرباء عن منزل سفير بلجيكا في مصر، بمنطقة العمرانية، بغرض السرقة، قائلة: «فيه حرامي اتسبب في قطع النور 3 ساعات عن بيت السفير البلجيكي في العمرانية، كان هيعملنا أزمة دبلوماسية بسبب سرقة أسلاك الكهرباء». 

وأضافت ياسمين عز، خلال برنامج «كلام الناس» المذاع على قناة إم بي سي مصر، «اللي لفت نظري هو ليه سفير بلجيكا قاعد عندنا في العمرانية ليه مش في حتة تانية». 

وتساءلت ياسمين عز، قائلة: «هل السفير عنده قرايب في العمرانية أو عايز ياكل مكرونة انسجام، بالنسبة للحرامي أنت صغرتنا قدام الأجانب ومش سارق حاجة كبيرة، وبعدين كان ممكن تتكهرب يعني سرقة وفضيحة». 

ليه نعاقب المواطن على مخالفة معملهاش

وفي سياق آخر، علقت الإعلامية ياسمين عز على أزمة العدادات الكودية التي تصدرت حديث الناس عبر وسائل التواصل الاجتماعي في الأونة الأخيرة، قائلة: « ناس كتير بتشتكي أنه فاتورة الكهربا بتزيد عليهم وهتزيد أكتر عشان الصيف والحر اللي داخل علينا والحكومة قررت أنه كل العدادات الكودية تتحاسب بسعر أعلى شريحة». 

وأضافت ياسمين عز، خلال برنامج «كلام الناس» المذاع على قناة إم بي سي مصر، « واللي بيتحاسب في كل الموضوع ده هم السكان والمواطنين العاديين وليسوا أصحاب العقارات نفسهم، ف ليه نعاقب المواطن على مخالفة معملهاش ويجي يتصالح يلاقي الإجراءات صعبة»، متابعة: «وصاحب العمارة اللي عمل المخالفة كسب ومشي».