بعد تصريحات رامي صبري.. سامر أبو طالب: "محدش جاب سيرتك لا من قريب ولا من بعيد"
خرج الملحن سامر أبو طالب عن صمته ليعلق على التصريح الأخير للمطرب رامي صبري، الذي اتهم من خلاله الملحنين والشعراء بعدم التجديد، وذلك من خلال مقطع فيديو عبر حسابه الرسمي على موقع التواصل الإجتماعي فيسبوك.
تعليق سامر أبو طالب على رامي صبري
حيث قال سامر أبو طالب: “بقالنا فترة زمايلنا الملحنين وشعراء حاسين أن في تجاهل وطلعوا وأتكلموا كلمتين من قلبهم، وأنا ضميت صوتي لصوتهم ومش معنى كده اننا بنشحت، فكرة التجاهل هنا هي أننا بنبعت لناس عرفنا ومسجلين أرقامنا وفي بينا كلام وقعدات مزيكا وبرا المزيكا، وفي ناس اشتغلنا معاهم قبل كده ونجحنا مع بعض، لكن أنك متردش أصلا دي حاجة مش كويسة، ولا في حقك ولا في حقنا كصناع لأن الموضوع ده مؤذي جدًا، تقدر بكل بساطة تقول لا مش عاجبني لا مش حلو، ومحدش هيزعل لانك أنك ترد ده تقدير منك، هخص بالذكر النجم الكبير رامي صبري اللي أنا بحبه جدًا على المستوى الشخصي، محدش جاب سيرتك في الموضوع ده أه انت من الناس اللي مبتردش والوحيد اللي طلع اتهمنا بعدم التجديد، لا أحنا عندنا جديد ومتطورين وأنا عن نفسي متميز جدًا في حتتي، أنت بس اللي مبتفتحش الشات عشان تاخد بالك، الناس اللي انت اتهمتها دي ليها أسامي وليها نجاحات، أنا نجحت مع عمرو دياب وتامر حسني وإليسا ولطيفة ورامي جمال، بقالي 12 سنة ملحن وخطواتي الحمدلله كويسة، أنت مكنتش موفق خالص في التصريح اللي قولته خصوصًا أن محدش جاب سيرتك أحنا أتكلمنا عن المطربين عمومًا”.
منشور سامر أبو طالب
في سياق متصل، قد علق الملحن سامر أبو طالب على منشور الملحنين نادر نور وإسلام زكي وشكواهما من قلة العمل، مشيرًا إلى أنه يمر بنفس التجربة، حيث كتب سامر أبو طالب عبر حسابه بموقع فيسبوك، أنه يعاني أيضًا من نفس المشكلة :"دول ٢ بوست لاتنين من أهم الملحنين فى الوطن العربى (بالأقدمية) الفنان الكبير نادر نور اللي ليه نجاحات كتير يشهد عليها الوطن العربى وجمهور الفن كله، والفنان إسلام زكى اللي برضه ليه حاجات مهمة وناجحة في مشواره وكل الناس بتحبها ..اللي الفنانين دول بيعانوا منه هو هو اللي أنا بعاني منه بقالي فترة كبيرة أوي وللأسف بكتم جوايا وبسكت ومابرضاش اتكلم".
