بعد نادر نور وإسلام زكي.. سامر أبو طالب يشكو: المطربين بطلوا يردوا علينا
علق الملحن سامر أبو طالب على منشور الملحنين نادر نور وإسلام زكي وشكواهما من قلة العمل، مشيرًا إلى أنه يمر بنفس التجربة.
وكتب سامر أبو طالب عبر حسابه بموقع فيسبوك، أنه يعاني أيضًا من نفس المشكلة :"دول ٢ بوست لاتنين من أهم الملحنين فى الوطن العربى (بالأقدمية) الفنان الكبير نادر نور اللي ليه نجاحات كتير يشهد عليها الوطن العربى وجمهور الفن كله، والفنان إسلام زكى اللي برضه ليه حاجات مهمة وناجحة في مشواره وكل الناس بتحبها ..اللي الفنانين دول بيعانوا منه هو هو اللي أنا بعاني منه بقالي فترة كبيرة أوي وللأسف بكتم جوايا وبسكت ومابرضاش اتكلم".
وأضاف سامر أبو طالب أن لديه رصيد كبير من الأعمال ونجاحات مع كبار النجوم: الحمدلله عندى رصيد أغاني محترم واشتغلت مع نجوم الوطن العربي ميجا ستارز ونجوم شباب من أول ( عمرو دياب ومحمد منير وتامر حسنى وهاني شاكر ووائل جسار ومحمد عدوية واليسا ولطيفة وهيفا وهبى ونجوم شباب كتير ) مع حفظ الألقاب ..الحمدلله وبفضل ربنا وحده أنا واثق في موهبتي وعارف ان انا بقدم حاجة محترمة وفن بجد ومميز وده مش غرور اعوذ بالله دي ثقة في الموهبة اللى ربنا اختصنى بيها وبحمده وبشكره على النعمة دى من ضمن نعم كتير اوى لا تعد ولا تحصى ربنا ادهالي".
وأكمل: “الفكرة ان المطربين ( إلا من رحم ربي) بطلوا يردوا حتى اللي عارفني كويس وبنا عيش وملح وسنين فاتحين في شغل حتى لو ماتمش بس اتقابلنا كتير وقعدنا واشتغلنا على مر السنين فا المفروض إنك تقديراً لفني ولشخصي ترد ( مع تقديرى لظروفك اللى بتبقى فيها ) بس أكيد أنت مش علطول مش فاضي أو مش شايف التليفون ( واتساب او مكالمات ) الفكرة هنا أن ده بيحبط الفنان اللى زيى انا و غيرى لان احنا حساسين جداً وغير أي بنى آدم، فا لحاجات دي بتفرق معانا أوي".
