مي عز الدين: قعدت 15 يوم أروح المستشفى لماما أكلمها بس مكنتش بتسمعني

كشفت الفنانة مي عز الدين عن واحدة من أصعب اللحظات في حياتها، عندما تلقت خبر مرض والدتها أثناء وجودها على المسرح بعد انتهاء أحد العروض الفنية.

كنت أشعر بوجود أمر غير طبيعي

وقالت «مي»، خلال لقائها مع الإعلامية إسعاد يونس، ببرنامج «صاحبة السعادة»، إنها كانت تشعر بوجود أمر غير طبيعي من ملامح من حولها، موضحة: «كنت بعرض على المسرح، وبعد ما خلصت كنت حاسة من وشوش الناس حوالي إن في حاجة مش تمام، بس مش راضيين يقولوا لي».

وأضافت: «بعد ما خلص العرض قالوا لي هتركبي طيارة وتنزلي على مصر حالا، وقالوا لي مامتك في المستشفى تعبت شوية، وأنا عارفة إنها كانت بتتعب من وقت للتاني».

وتابعت: «روحت المستشفى لقيت إن الموضوع مش كده خالص، كان قلبها وقف أكتر من مرة، وكانوا بيعملوا لها صدمات كهربائية، ورجعوا ينعشوها تاني، وكانت حالتها صعبة جدا».

وأشارت إلى أنها بقيت بجوار والدتها فترة في المستشفى، قائلة: «كنت بروح كل يوم، وأنادي عليها، بس هي ما كانتش واعية».

واستكملت حديثها قائلة: «فضلنا كده حوالي 15 يوم، وفي اليوم الـ15 توفت، وكان ده أصعب وقت»، وقالت: «يمكن ربنا كان مهيئني بالتدريج، مش عايز الصدمة تيجي مرة واحدة، وده اللي خلاني أقدر أستوعب شوية، رغم إن الألم كان كبير جدا».

وكانت كشفت الفنانة مي عز الدين عن تفاصيل أزمة نفسية صعبة مرت بها قبل سنوات، مؤكدة أنها كانت من أكثر التجارب التي أثرت في شخصيتها وغيرت نظرتها للحياة بشكل كامل.

مررت بأزمة نفسية صعبة

وقالت مي عز الدين، إن تلك الأزمة كانت السبب في دخولها حالة نفسية قاسية، موضحة: «هي اللي تعبتني قوي نفسيا، وعلى فكرة أنا وقفت بعدها على رجلي أعمل مسلسل "خد حتة حرير"، بس أقسم بالله أنا كنت بمثله زي لما مثلت "قلبي ومفتاحه"، حاسة إني كنت على الأوتوماتيك».