عارفة عبدالرسول توجه رسالة لمديري الإنتاج : حافظوا على ما تبقى من الإنسانية

انتقدت الفنانة عارفة عبدالرسول نظام القبض في الأعمال الفنية، بسبب مديري الإنتاج، حيث أكدت أن القبض بشكل أسبوعي للعاملين بالأعمال الفنية يؤثر على التزاماتهم المادية.

وكتبت عارفة عبدالرسول عبر حسابها الشخصي على فيسبوك : "من أول ما بدأت طريق الاحتراف وأنا بعمل عقد بيتقسم على عدة دفعات، كل فترة أخد دفعة، والدفعة الأخيرة بعد عرض العمل الفني، كل الممثلين تأقلموا ونظموا نفسهم على كده، العمالة كلها كانت بتقبض باليوم، يخلص يومه يقبض، قالك لأ انتوا هتقبضوا بالأسبوع، يبقى الواد شغال يا عيني يوم واحد وأول الأسبوع يستنى لما الأسبوع يخلص يوم الخميس ويقبض اليوم بشيك، ويستنى ليوم الحد عشان يصرفه".

وواصلت : "العيال يا عيني مش عارفى تمشي حياتها ويستروا نفسهم، السواق مش عارف يجيب بنزين، والمساعد مش عارف يروح للعيال بالأكل، بشوف مهازل، بيقعدوا يستلفوا من بعض، ولما يقبض يبقى مش عارف يسدد لأنه استلف أكتر من اللي جاى، وكمان عامل حسابه إنه هيقعد كام يوم من غير فلوس، تسمع بقى خناقات ودوشة وورطات واقعين فيها"

واختتمت عارفة عبدالرسول : "رجاء للسادة مديري الإنتاج، رجعوا العيال يقبضوا باليوم كاش زى ما كانوا، حفاظاً على ماء الوجه وحفاظاً على ماتبقى من الإنسانية والرحمة".