بدل الأكياس خزني مشاعر لجوزك.. ياسمين عز: عندك النيش مليان كوبايات مدهبه

علقت الإعلامية ياسمين عز على فكرة الإكتناز القهري الذي تقوم به بعض السيدات داخل منازلهم، قائلة: «عندي سؤال ليه أي حاجة بتدخل بيتكم مش بتطلع، إي كل الكراكيب دي علب النسكافيه القديمة محتفظة بيهم ليه وكوبايات الجبنه بتاعة بريزيدن ولافشكري بتتغسل وبتشربي فيها شاي ليه بتشربي ليه في برطمان وانتي عندك النيش مليان كوبايات مدهبة». 

وأضافت ياسمين عز، خلال برنامج «كلام الناس» المذاع على قناة إم بي سي مصر، « وبتحطي في برطمان الجبنه عصير للضيوف ليه هما الضيوف عملولك حاجه وحشة ولا اي، ودرج الأكياس واخد حيز من حياتكم ليه، ده بيإذي الطبيعة يا حبيبتي وبيعمل كركبة في المطبخ». 

وتابعت: « الأولى لو عايزة تخزني خزني شوية مشاعر لجوزك الغلبان وتحت المرتبة المفروض يبقى فاضي عشان الطاقة تطلع عليكي بالليل وانتي نايمه وتحلمي أحلام سعيدة وليه نحط تحت المرتبة أوراق وكراكيب وعقود قديمة». 

وفي سياق آخر، قالت الإعلامية ياسمين عز، إن التوقيت الصيفي ابتدا فدلوقتي عندك ساعة زيادة هدية تلبسي فيها لجوزك خلخال وتدلعيه. 

وأضافت، خلال برنامج «كلام الناس» المذاع على قناة إم بي سي مصر، «لو عايزة تهبلي جوزك البسي خلخال وشخللي بيه في الشقة قلبه هيتشخلل شخاليل». 

ساعات النهار زادت ساعة

وتابعت: «ساعات النهار زادت ساعة بحالها وهذا معناه إنه الشمس بتهديكي ساعة زيادة تشوفي فيها عيون فرعونك العسلية في الشمس اللوزية وتبتدي تتملي فيهم شوية، وتشوفي إنعكاس ضوء الشمس على شعيرات جوزك المجعدة المجلدة وتقوليله كلمتين حلوين من نفسه من غزل ومدح وذم ونفاق تخليه يبتسم عشان تشوفي أسنانه اللولي اللي بتلمع في الشمس». 

وأوضحت: «الحياة فرص وانتي النهاردة الحياة اديتلك فرصة ساعة زيادة تحبي فيها جوزك وتدلعي فيها جوزك وتلبسيله خلخال فاعملي اي حاجه في الساعة الزيادة دي». 

وفي سياق آخر، استضافت الإعلامية ياسمين عز المطرب الشعبي حجازي متقال في برنامجها «كلام الناس» على قناة «MBC مصر»، وتضمن اللقاء فقرة تناولت بعض ملامح الفلكلور الصعيدي.

حجازي متقال مع ياسمين عز

وخلال الحلقة، قدم حجازي متقال هدايا لياسمين عز، عبارة عن «بلاص» مزخرف بألوان مبهجة و«نبوت»، وحيث أعربت ياسمين عن سعادتها بالهدايا قائلة: «والله فاجأتني بيه، شكرا على البلاص.. جميل جدا والحاجات الفلكلورية حلوة أوي.. بس لما اديتني النبوت.. تقيل أوي يا ريس.. ده تقيل جدا ده أنا كنت هقع بيه».