رشا سامي العدل تكشف تجربتها مع نظام الطيبات لـ ضياء العوضي

كشفت رشا سامي العدل، تجربتها الخاصة مع نظام الطيبات الخاص بالدكتور الراحل ضياء العوضي.

وكتبت رشا سامي العدل عبر حسابها بموقع فيسبوك: “رحمة الله على دكتور ضياء العوضي... أنا عملت زي ليستة خاصة بيا أنا شخصيا من نظام الطيبات امشي عليها، من ساعة ما جالى جلطة في القلب وأنا بحاول آكل صحي شوية فبقيت باكل رز بني توست كامل الحبة مسلوقات ومشويات حتى المعكرونة بجيبها الحبة الكاملة اه طبعا بعٌك فى النص اعترف بس ده مش صح”.

وأضافت رشا سامي العدل: “مشكلتي إن أنا تقريبا مش باكل ولا كل يوم باكل فواكه حتى ازازة الكولا الـ٥٠٠ مل ممكن تقعد جمبي ٤ أيام اخد منها بوق او اتنين لحد ما تبوظ و ارميها نصها لسة فيها وبرضه بتخن جدا ... زمان كنت ٤٨ كيلو و لما زدت وصلت ل ٥٦ و ثبتت عليهم سنين عمر يعني فجأة وبدون مقدمات ابتديت اتخن جامد بدون مبرر واضح بالنسبالى عملت كل التحاليل، ظبطت الكوليسترول والدهون اللى مش عارفة جت فجأة منين وصل بيا انى عملت شفط كمان و مفيش فايدة.. جربت أنواع كتير من الدايت اخس كام كيلو صغيرين و فجأة أضرب تاني”.

وأكملت: “وأنا بكلمكم دلوقتي أنا 82 كيلو، بدعامتين في قلبي، انزلاق غضروفى في فقرتين، عرق النسا، شوكة عظمية، جفاف فى العين، تصبغات فى وشي طلعت فجأة ، تقيلة و تعبانة ،على طول وجع او التانى، نغزات فى صدري وضيق تنفس احيانا،  أورام فى الرحم والفخد.. أنا سني صغير على كل ده و طبعا الحمد لله على كل شيء اللهم لا اعتراض، بس ثواااانى ربنا ماخلقنيش كدة سوء التغذية من الصغر هو اللى وصلني لده و دي قناعتي الخاصة أنا أللى عملت كدة فى نفسي ولازم أغير أسلوب حياتي Change my lifestyle مش بس اكل و شرب نوم و راحة و تمرين ، بـ اختصار اهتم بنفسي وصحتي الجسدية والنفسية واعتزل كل ما يؤذيني حتى لو بشر وأقرب الناس”.

وواصلت: "النظام اللى حطيته لنفسي الفطار: توست الحبة الكاملة محمص بزبدة ومربي بيتي أو بـ الجبن المسموحة (جودا فلمنج ريكفورد برميزان كاشكاڤال موتزريلا ) و زيتون او بطاطس محمرة مع كوب شاى اخضراو قهوة تركى، واحدة موز/تين/مشمش/برقوق او فراولة/تمر
الغداء: رز كامل الحبة ، موزة ضان مسلوقة و بعدين مشوحة بزبدة او حمام محشى رز/فريك او حتة ستيك ضان او بتلو مشوية جريل او فرن او طاسة او لحم ضان او بتلو مكعبات مسلوق/محمر فى زبدة/ مسلوق حتى يتشرب الماء و يكون صوصه الخاص او اير فرايد،  كبدة ضان ، حبة ذرة مسلوقة و عليها زبدة او بدون/او حبوب مسلوقة ، بطاطس (بوريه/محمرة/ماش/baked)، سمك فريش مشوى (مش مزارع)
العشاء: مثل الفطار 
السكريات: استخدام ستيڤيا من مصدر موثوق منه
بين الحين والآخر بسبوسة/نوتيلا و نعتبره زي اليوم الفرى
العيش: توست الحبة الكاملة والتأكد من عدم خلطة بالدقيق الابيض (بيكون مكتوب)
الدواء: عدم توقيف اى دواء نهائي إلا فى حالة اختفاء المرض 
الزيوت: زيت زيتون/عباد الشمس/الذرة/ذبدة
مع مراعاة ان مثلا الذرة والحلويات والبطاطس المقلية مش كل يوم (شخصيا انا هاعتبره يوم فري)
اللحوم والطيور والأسماك مش كل يوم نفس الصنف نبدل بينهم بحيث يكون فيه فرق يوم على الاقل 
ملحوظة: انا بكره النوتيلا ومش بطيق طعمها ومش بطيق المياة اخري اشربها و انا باخد دواء لأنها بالنسبالى زى الدواء بالظبط ، ف اخري لتر مياة فى اليوم بغصب نفسي عليها 
او كنت بعمل ديتوكس بنعناع و ليمون (ممنوعات فى الطيبات)