تعاني من ورم بجذع المخ.. رشا سامي العدل تطلب الدعاء للفنانة إنجي عبد الله
طالبت رشا سامي العدل، الدعاء للفنانة إنجي عبد الله، بالشفاء في ظل الأزمة الصحية التي تعاني منها، حيث كانت قد أعلنت مؤخرًا معاناتها من ورم حميد في جذع المخ.
وكتبت رشا سامي العدل عبر حسابها بموقع فيسبوك: “البوست ده مهم جداً ليا، إنجى محتاجة دعوات من كل الناس اللي يعرفها ومايعرفهاش وأختها كمان محتاجة دعوات كتير، أنا أعرف إنجي من حوالي ٢٥ سنة من أيام ما فازت بملكة جمال مصر وكانت بنوتة قمر وشقية بس طول عمرها طيبة وبتحب الحياة وعمري ما شوفت منها حاجة وحشة”.
وأضافت رشا سامي العدل: “إنجى دلوقتي بتعانى من ورم في جزع الدماغ و علشان اتعرضت لإشعاع و كيماوي قبل كدة الدكاترة توصلوا ان ماينفعش تعملهم تاتى لان ده هايأثر عليها بالسلب في الحركة وفي التنفس ف للأسف في إستحالة حاليا للعلاج الجزري و مكتفيين بحاجات بسيطة تقلل من الأعراض، اخت إنجى اللي واقفة جمبها حاليا هي نفسها عندها ورم في الرئة والمخ، الاثنين الله يكون في عونهم و معاهم ويخفف عنهم و يشفيهم”.
وتابعت: “كل اللي بطلبه من كل الناس اللي يشوفوا البوست ده انهم يدعولهم كتير من قلبهم لعلها ساعة إستجابة وربنا قادر علي كل شيء، اللهم ارنا عجائب قدرتك واشفي إنجى وأختها وخفف آلامهم وعافيهم يا رب”.
