يارا السكري: أنا من عشاق سيلفستر ستالون.. ولما شفت مشهد ليه بيموت اتقهرت

علقت الفنانة يارا السكري على حالة التفاعل الكبيرة من الجمهور بعد مشهد وفاتها في مسلسل “علي كلاي”، مؤكدة إن ردود الفعل فاجأت فريق العمل بالكامل خلال التصوير.

ارتباط الجمهور بالشخصيات طبيعي جدا

وقالت “السكري” خلال لقائها مع الإعلامية إسعاد يونس ببرنامج “صاحبة السعادة”، إنهم كانوا في اللوكيشن وقت عرض الحلقات، وفجأة بدأت تنتشر فيديوهات الجمهور بشكل واسع، مضيفة: “اتفاجئنا جدا بالفيديوهات، وكلنا كنا مبسوطين قوي بصراحة، لأن ده دليل إن الناس اتأثرت بجد”.

يارا السكري: أنا من عشاق سيلفستر ستالون

وأوضحت إن ارتباط الجمهور بالشخصيات طبيعي جدا، خاصة لما العمل يكون مؤثر، مستشهدة بموقف شخصي ليها، قائلة: “أنا مثلا من عشاق سيلفستر ستالون، وكنت بتفرج على سلسلة أفلام The Expendables، ولما شفت الجزء الرابع واتفاجئت إنه بيموت في أول 10 دقايق، اتقهرت جدا وقعدت مش مصدقة!”.

تأثر الناس بمشهد موت “روح”

وأضافت إن الإحساس ده هو نفس اللي الجمهور عاشه مع شخصيتها، متابعة: “الناس لما شافت موت روح، بدأت تحلل: إزاي شنطتها ما اتحرقتش؟ طب يمكن اتخطفت؟ يمكن هترجع؟ محدش كان مصدق إنها ماتت”.

وأكدت أن حجم التفاعل كان غير طبيعي، لدرجة إن كل الناس اللي ليها علاقة بالمسلسل كانت بتتسأل نفس السؤال: “روح عايشة ولا ماتت؟ أكيد هترجع!”.

واعتبرت يارا أن هذا أكبر دليل على نجاح الدور، لأنه خلى الجمهور يتعلق بالشخصية ويعيش تفاصيلها كأنها حقيقية، مش مجرد أحداث درامية.

كما أشارت إلى إن حالة الحب دي ظهرت بشكل واضح في تعليقات الجمهور وكلامهم معاها بشكل مباشر، وهو اللي خلاها تحس بقيمة العمل وتأثيره الحقيقي.