كيف تحول حب «علي كلاي» لـ«حياة» إلى موقف شخصي؟.. يارا السكري توضح
كشفت الفنانة يارا السكري، خلال لقائها في برنامج “صاحبة السعادة”، كيف تحولت قصة حب “علي كلاي” لحياة من مشهد تمثيلي، إلى موقف شخصي، مشيرة إلى كواليس المشاعر اللي سيطرت عليها أثناء التصوير.
اندمجت جدا مع الشخصية
وقالت يارا إنها اندمجت جدا مع الشخصية لدرجة إنها كانت بتتعامل مع زمايلها كأنهم فعلا جزء من حياتها، مش مجرد تمثيل، موضحة: “أنا حسيت إني بستضيفهم في بيتي بجد، فبقيت لطيفة معاهم ونهزر ونخرج سوا ونعمل عزومات، وكأننا عيلة واحدة مش مجرد فريق عمل”.
وأضافت إن اندماجها وصل لمرحلة إنها بقت تتفاعل مع الأحداث بشكل شخصي، خصوصا مع تطور العلاقة بين الشخصيات، قائلة إن بعض المشاهد خدتها بعيد عن فكرة التمثيل، لدرجة إنها حست إن “دي روح مش يارا”.
أكثر مشهد أثر فيها
وكشفت عن أكثر مشهد أثر فيها، وهو بعد وفاة شخصية “روح”، لما شافت “علي كلاي” بيزور قبرها ومعاه حياة، وقالت: “المشهد ده قفشني جدا، حسيت إزاي بعد الحب والمعاناة دي كلها، يجيب واحدة تانية عند قبرها ويقعدوا يهزروا! اتغصيت واتحرقت من جوايا”.
وتابعت إن الموضوع تطور معاها لدرجة إنها اعترضت داخل لوكيشن التصوير، وقالت لزملائها بشكل تلقائي: “إزاي يحصل كده؟ إزاي بعد كل اللي حصل فيها، يروح ياخد الأرض اللي كانت باسمها وهو مع واحدة تانية؟ لا كده مفيش أمان خالص”.
قوة العمل وتأثيره
وأكدت يارا إن ده دليل على قوة العمل وتأثيره، لأنه خلاها تتعامل مع الأحداث وكأنها حقيقية، مش مجرد دور بتمثله، وهو اللي وصل الإحساس ده للجمهور بنفس القوة.
وفي جانب تاني من اللقاء، اتكلمت يارا عن الغيرة، وقالت إنها بطبيعتها بتغير، لكن في الحدود اللي تستدعي ده، موضحة: “أنا ممكن أغير بس مش بحب أبين ده، وبحب الراجل اللي يفهمني من غير ما أتكلم”.
بحب الرجل اللي عنده ذكاء عاطفي
وأضافت إنها تفضل الرجل اللي عنده “ذكاء عاطفي”، يقدر يحتويها ويفهم تقلباتها، قائلة: “أهم حاجة عندي إنه ما يهونش عليه زعلي، ويعرف يلم الموضوع بسرعة، لأن الست بطبيعتها فيها أكتر من شخصية، ومحتاجة اللي يفهم ده ويتعامل معاه صح”.
لفتت إلى أن الغيرة لو زادت عن حدها بتبقى مزعجة، لكنها في نفس الوقت إحساس طبيعي، المهم يكون في توازن وفهم بين الطرفين.
