ضياء عبدالخالق: سقطت في اختبارات معهد الفنون المسرحية مرتين واتقبلت أخر مرة
كشف الفنان ضياء عبدالخالق عن بدايته في التمثيل، قائلا: «أنا في الدايه كنت بمثل في الجامعة وكان عندي صديق قالي إيه التمثيل ده يعني هتبقى إيه كومبارس؟ لكن أنا كنت مصمم على التمثيل لحد ما جه الدكتور أشرف زكي يخرجلنا مسرحية وقالي لازم تدخل معهد الفنون المسرحية».
وأضاف عبدالخالق، خلال استضافته في برنامج «الستات ميعرفوش يكدبوا» المذاع عبر شاشة سي بي سي: «وقتها أنا عرفت إنها هتكون مهنتي، وقدمت مرتين ومتقبلتش لكن اتقبلت في المعهد تالت مره».
وفي سياق حديثه عن التمثيل، قال: «أنا ضد تقمص الشخصية، حتى الناس اللي اخترعت التقمص رجعت عن الفكرة لأنها خطيرة جدا جدا على الفنان والناس اللي معاه، أنا بدرس الشخصية وأفكر هي هتتصرف إزاي في كل المواقف وبحاول أقلدها».
قصة الزواج
وفي سياق متصل، كشف الفنان ضياء عبدالخالق، عن قصة زواجة من المخرجة شيماء شعوط، موضحا أنه تزوجها بعد شهر واحد من تاريخ لقاءها الأول، مؤكدا أنها وقفت بجانبه وتحملته كثيرا منذ بداياته.
وقال: «وقفت جنبي وإحنا بنتجوز ومكانش معايا فلوس الماذون وده حملني مسؤولية كبيرة اتجاهها علشان لأزم أحافظ عليها، وسبحان الله كان وشها خير عليا وجالي شغل وأخدت فلوس واتجوزنا».
ومن جانبها أضافت شيماء:« أنا لما كنت بشوفه الأول في الأعمال قولت ده بيشتغل غناوة يعني بمزاجه وده كان علشان طول الوقت مش بيظهر كتير».
وأردفت:« شوفته بالصدفه لما روحت زيارة لمسرحية بادي جارد مع الزعم عادل إمام وأول لقاء بيننا كان معاكسات، وقالي تعالى نتصاحب لكن أنا قولتله مش بصاحب ، قالي وأنا مش بتجوز».
وتابعت:« رديت عليه قولتله لو عايزة أتجوزك هتجوزك، وفعلا بعدها بشهر اتجوزنا».
وواصلت:« ولما جه ضياء يقدملي كان وقتها عيد ميلادي وقالي أجيب هدية إيه علشان أنا عايز هدية لازم موافقتك عليها لأني عايز أجيب دبل، وبالفعل جه اتقدملي وأنا مسمحتش لأخويا يقوله حاجه على الشبكة والمهر وكده، وقولتله هو أنت اللي هتتجوزه ولا أنا، لأن أولا دي حاجات تخصني، وكمان علشان ولا أنا ولا هو كان معانا فلوس نهائي واتجوزنا بأبسط الحاجات».
