فرح الزاهد: في ستات اتربت على عدم الاحترام والضرب بالنسبالها عادي
قالت الفنانة فرح الزاهد: «حصلي حالة انهيار بعد مشهد الضرب في مسلسل روج أسود، وكان صعب جدا لأني مشوفتش ده في حياتي لكن فكرة إن في ستات بتعيش ده كل يوم صعب جدا».
وأضافت: خلال حلقة اليوم من برنامج «الستات» المذاع عبر شاشة النهار: «في ستات كتير بتعاني من كل ده، وكمان في ستات اتربت على عدم الاحترام والضرب علشان هي كده كده كانت بتضرب في بيتها».
وتابعت: «في ناس بعتتلي تعليقات على قصة حبيبة بيقولولي إننا بنعيش نفس الحاجة وفي ستات أزواجهم بيمدوهم على رجلهم أصلا، ساعات الست بتكون ضحية لميراث غريب هو إن الست عادل تضرب».
وواصلت: «في ستات كانت فاكرة إن تحمل الإهانة قوة، لكن ده مش صح إنك تقولي لا وترفضي تستحملي الإهانة هي دي القوة الحقيقية، رفض الإهانة قوة، لكن في ستات بتستحمل علشان بتخاف من اللي بعد الطلاق».
وأردفت: «الجنة على الأرض بتتلخص في إن حد يشاركك كل مشاعرك ويقسم معاكي أحزانك كلها وتقل، أو مثلا يشجعك».
وعن كواليس العمل مع نجوم المسلسل: «كل نجوم العمل احتضنوني لأنهم أكثر مني خبرة، ورانيا يوسف رايقة جدا بتجيب راديو قديم وتسمع أغاني قديمة في اللوكيشن ولقاء الخميسي طول الوقت عاملة دايت حتى مش بتاكل معانا في المشاهد، وداليا مصطفى طول الوقت بتنصحني»
وفي وقت سابق، أكدت الفنانة فرح الزاهد سعادتها الكبيرة بردود فعل الجمهور على دورها الأخير في مسلسل «روج إسود» الذي تم عرضه خلال السباق الرمضاني الأخير لهذا العام، مشيرة إلى أن تفاعل المشاهدين مع الشخصية كان مؤثرا للغاية، خاصة بعد الرسائل التي تلقتها من فتيات يعانين من العنف الأسري.
وقالت فرح الزاهد، خلال مداخلة عبر قناة الشمس، إنها تأثرت بشدة بحجم التعاطف مع الشخصية التي جسدتها خلال المسلسل، موضحة: «انبسطت جدا إن الناس فهمت الدور وحست بيه، وده بالنسبة لي أهم حاجة».
ليس مجرد أداء تمثيلي
وأضافت أن العمل لم يكن مجرد أداء تمثيلي، بل تجربة إنسانية حقيقية، مؤكدة أنها تلقت العديد من الرسائل من فتيات عبرن عن تشابه معاناتهن مع ما تم تقديمه، قائلة: «كان قلبي معاهم بجد واتمنيت إنهم يقدروا يتعلموا من الشخصية».
