عن انتحار فتاة سموحة.. راندا البحيري: "اللي عملته عمره ما كان حل"
خرجت الفنانة راندا البحيري لتعلق على واقعة انتحار فتاة سموحة، موضحة أنه يجب ألا نقف في صفها خاصة أن ما قامت به لا يمكن أن يكون الحل، وذلك من خلال منشور عبر حسابها الرسمي على موقع التواصل الإجتماعي فيسبوك.
تعليق راندا البحيري على واقعة انتحار فتاة سموحة
وقالت راندا البحيري في منشورها: “ممكن اكون لحد دلوقتي متكلمتش عن الواقعة ربنا يغفرلها، و لكن أرجو من الجميع من الجميع ان لو حصل لهم اي حاجه في حياتهم صعبة او واجهوا أي مشكلة كبيرة يتصلوا بالأرقام اللي الدوله نزلتها امبارح و يلاقوا حد يتكلموا معاه، ولازم كلنا نقتنع بنسبة ١٠٠ في ال ١٠٠ ان اللي هي عملته عمره ما كان ((الحل))، أنا مُقدره كم التعاطف و انا شخصياً متعاطفه جدااااا معاها، بس مينفعش دماغنا تروح ان هي صح او ان ده كان حل لمشاكلها أبدا، ده البني ادم بيخلق دوافع ل نفسه علشان يعيش، ما بالك هي عندها ارواح في رقابتها و أولاد محتاجينها ربنا يعينهم”.
راندا البحيري: “اللي مريت بيه ميتحكيش”
واستكملت راندا البحيري قائلة: “و اخيراً ربنا سبحانه و تعالي قال في سورة البقرة لَا يُكَلِّفُ اللَّهُ نَفْسًا إِلَّا وُسْعَهَا، و هي قاعدة قرآنيّة عظيمة تُؤكّد رحمة الله ولطفه، فالله لا يُحمّل العباد تكاليف شرعيّة أو أقداراً تفوق طاقتهم وقدرتهم، لا يكلف الله نفساً إلا وسعها، يعني طالما ربنا ابتلاك ال إبتلاء ده أو حاطك في المكانه دي او مديلك المسئولية دي يبقي أنت قدها و ده كلام ربنا، انت قدها وممكن جدا تكون مش عارف انك قدها، أنا مريت بظروف صعبة جدا جدا جدا و مش لازم و مش هينفع ان كل اللي حصل او كل اللي مريت بيه يتحكي، يمكن آخر ٦ سنين ١٠٠ مره حاولت اصور فيديو اقول فيه كلام و امسحه من موبايلي في الاخر، مكانش ينفع اني استسلم، و دورت جوا نفسي كتير أوي لحد ما اتاكدت ان طالما ربنا ابتلاني ب الناس دي في حياتي و بالحوارات دي في حياتي يبقي أنا قويه يبقي ده ((وسعي))، و ابتديت اعكس الأمور. بدل ما استسلم او اشتكي او اسأل حد علي مساعده. أبتديت أنا اللي أدور اجيب حقي ازاي و ابتديت استخدم قوتي لحد بالفعل ما الأمور اتحسنت بنسبة ١٠٠٠ في المية، اللهم لك الحمد و الشكر، و اتمني اتمني التوفيق للجميع يارب، واتمني ان كل واحد فينا يرضي ب اللي اتكتبله اولا ثم يحاول تغيير وضعه للأحسن”.
