راندا البحيري تنتقد أغنية مسلسل وننسى اللي كان

انتقدت الفنانة راندا البحيري أغنية تتر مسلسل وننسى اللي كان بطولة ياسمين عبدالعزيز والتي تقدمها المطربة بوسي.

وأكدت راندا البحيري أنها ترى أن صناع مسلسل وننسى اللي كان خاصة المخرج وقعوا في خطأ كبير باختيار أغنية بوسي في مشهد نهاية الحلقة الأخيرة من المسلسل، كما أشارت أن الأغنية في الأساس تحمل معاني ضد الدين.

وكتبت راندا عبر صفحتها الرسمية على فيسبوك : "أكبر غلطة وقع فيها صُناع المسلسل أو المخرج على وجه التحديد هي اختيار الأغنية اللي نزلت على مشهد النهاية .. أغنية بوسي بتاعت التتر اللي مش عارفة أغض النظر عن حرمانيتها .. بس لو غضيت حتى هي مش نافعة لمشهد النهاية".

وواصلت راندا البحيري : "الأغنية بتقول أنا عندي سؤال أسأل ولا بلاش؟ .. هو إحنا ليه على قد نيتنا مخدناش؟ .. مع إن ربنا سبحانه و تعالي قال في كتابه في سورة الأنفال الآية 70 إِن يَعْلَمِ اللَّهُ فِي قُلُوبِكُمْ خَيْرًا يُؤْتِكُمْ خَيْرًا .. صدق الله العظيم".

وأكملت : "وفي حديث الرسول عليه الصلاة والسلام حديث إنما الأعمال بالنيات .. هو حديث صحيح ومجمع على صحته .. يعد من أصول الإسلام .. أخرجه الإمام البخاري ومسلم في صحيحيهما عن الصحابي عمر بن الخطاب رضي الله عنه .. ويؤكد أن قبول الأعمال وجزاءها يعتمد على الإخلاص والنية .. سواءً كانت خيرًا أو شرًا".

وأضافت راندا : "فكده ربنا و رسوله الإتنين قالوا إن الأعمال بالنيات .. والأغنية بتقول العكس .. أنا أكيد مش هنا علشان أكفر اللي عملوا الأغنية يمكن ميقصدوش أو يمكن مش متبحرين بالقدر الكافي في الدين .. فده خلي ميزانهم يختل .. كل الاحترام ليهم لو ميقصدوش".

كما قالت البحيري : "بس للأسف الأثر بيبقى .. يعني هم ميقصدوش إنهم يكتبوا كده ويغنوا كده .. بس الأثر إيه؟ .. إن الناس هتردد الجمل دي مُغناه بصوت جميل والنفس هتعيش معاه وهتصدقه .. ده غير إن الأشخاص اللي جاهلين بأمور دينهم ممكن بالفعل يصدقوا الكلمات دي .. ويتخيلوا إن النية مش مهمة وإنك مش هتاخد علي قدر نواياك".

واختتمت راندا البحيري : "ربنا يسامحهم لو ميقصدوش ويهديهم لو يقصدوا .. كل ده كوم .. وإن أصلًا الأغنية مش لايقة على أحداث المشهد الأخير .. فبجد معرفش نزلت ليه على النهاية".