خالد الصاوي يكشف قصة تبنيه لطفلة: معنديش أولاد لكن عندي مشاعر أبوة

كشف الفنان خالد الصاوي، عن قصه تبنيه لطفلة وجدها في الشارع، قائلا: «أنا معنديش أولاد لكن عندي مشاعر أبوه واختبرتها مع هدي، وهدى دي بنت شوفتها في سنة 1986 كان في أحداث معينة تستدعي وجود حظر تجوال».

وأضاف، خلال استضافته في برنامج «الستات ميعرفوش يكدبوا» المذاع عبر شاشة سي بي سي: «لقينا طفلة رضيعة عربية جت رمتها ومشيت، الأول فكرت ألحق العربية دي علشان أفجرها، لكني روحت القسم ونزلت بدون تصريح علشان أروح القسم لأنها كان لازم تكون في أيد أمينة النهاردة لأنر معرفش مين هيعمل فيها إيه وكل كمين قابلنا تفهم ده جدا».

وتابع: «بعد القسم روحنا لدار رعاية وفضلت أشوفها فترة لحد ما توفت، وبقا عندي شعور إن ربنا نجدها من مصير مجهول، وفي نفس الوقت كنت حزين لأني تعلقت بيها جامد جدا».

وواصل:«وإحساس الأبوه التاني كان في كلابي الصغيرين، جبت واحد وبعدين جبت 8 كلاب، وارتبطت بيهم كأنهم ولادي، وربنا حط الكلاب في سكتي علشان يحط الرحمة في قلبي».

وفي سياق حديثه، وجه الفنان خالد الصاوي نصيحة هامة للشباب، قائلا: «هتقابل ناس كتير ممكن تشكك في نفسك، أنا في مخرج كبير كل الناس بتحبه قالي أنت يجي منك لكن عمرك ما هتبقى نجم مشهور وده وأنا عندي 30 سنه، والجملة دي خلقت عند جوايا».

وتابع: «لازم تعرف نفسك وتحترم تاريخك، والشعوب اللي بتعيش على الموضة مش هي دي الشعوب العظيمة خالص، حتى الأمريكان اللي تاريخهم أول امبارح بيعملوا لنفسهم تاريخ».

وأردف: «إحنا جيل بيحترم تاريخه وبيمد إيده للأجيال التانية، وده سبب في إننا بنمد إيدنا للجيل الصغير لأننا اتلسعنا قبل كده والجيل اللي قبلنا مكانش كده، ومساحة أدوار الشباب زمان كانت مدمن أو إرهابي على هامش القصة وكافحنا علشان نثبت نفسنا».

نقد اجتماعي وسياسي قوي

وفي سياق سابق، أكد الفنان خالد الصاوي أنه لا يوجد فن قوي دون نقد اجتماعي وسياسي قوي، فمن الضروري مناقشة وطرح قضايا جريئة ومهمة.

وأضاف خالد الصاوي في لقاء مع الإعلامي أحمد سالم في برنامج كلمة أخيرة على قناة ON:"مفيش فن قوي من غير نقد اجتماعي وسياسي قوي، ولو عاوز تصلح المجتمع تعمل حاجتين تربي الناس كويس وترشد الفن بأنك تعمل موضوعات قوية وجامدة وذات قيمة ويشارك فيها كتاب كبار وتستند إلى أصول أدبية وتراثية مهمة".

وتابع خالد الصاوي:"أنا خايف على بلدي وبحب الجمهورية الجديدة ودافعت عنها وضحيت علشانها على قد ما قدرت، وضحيت كتير كان عندي أجر كبير واقتص النص، وقلت طالما هيخدم البلد الجديدة مش هعمل مشاكل أنا وزمايلي وكنا ممكن نعمل مشاكل كتير ونقول مش هنشتغل، لكن أنا آمنت بالمشروع وشفت أنه بيتحقق وكان فيه إحياء ضايعة ودلوقتي بقيت أحسن، والفلوس مش بتتنهب مننا، ومحدش بيحب يتاخد منه ضرايب لكن لو شايفها رايحة للبلد فمن باب الإنسانية والرجولة والجدعنة انه يتوافق عليها".