زوجة إبراهيم شيكا: "خذلونا في حياته... وتجاهلوه بعد وفاته" (فيديو)

روت هبة التركي، زوجة لاعب الزمالك الراحل إبراهيم شيكا، تفاصيل موجعة عن خذلان محيطهم القريب خلال رحلة المرض وبعد الوفاة. قالت: "كثيرون خذلوني، ماكنتش عايزة منهم فلوس، كنت محتاجة بس حد ييجي يشوفه، يطبطب عليه، أو حتى يجي العزاء… لكن للأسف، محدش جه".

وفي مداخلة مؤثرة عبر برنامج "90 دقيقة" مع الإعلامية بسمة وهبة، قالت "هبة التركي، رغم إقامة العزاء داخل نادي الزمالك، وهو المكان الذي شهد بداية مشوار شيكا الكروي، لم يحضر من اللاعبين سوى أربعة فقط: قفشة، وسيد نمار، ومحمد شحاتة، وحسين السيد، بينما غاب الباقون تمامًا، كما غابوا خلال فترة مرضه.

اتهامات بالادعاء والتجارة 

لم يقتصر الألم على الجانب المادي أو المعنوي، بل تجاوزه إلى موجات من التشكيك والطعن في النوايا، كما أوضحت هبة: "ظلموه وهو عايش، اتهموه إنه بيتمارض، وإنه بيتاجر بمرضه عشان ياخد دعم… وعشان كده، لما توفى، كتير منهم ما حسوش بأي مسؤولية تجاه وداعه".

وأضافت: "ماكنتش بتهرب من الإعلام، زي ما الناس قالت، أنا كنت منهارة، مش قادرة أتكلم، حسيت إني خسرت المعركة اللي كنت بحارب فيها بكل طاقتي".

دعم رمزي من الزمالك

رغم التاريخ الطويل الذي جمع شيكا بنادي الزمالك، كشفت هبة أن النادي لم يقدم أي دعم يُذكر خلال الأزمة، قائلة: "روحت النادي، وادوني ظرف فيه 3000 جنيه، رفضته، مش عشان المبلغ، لكن عشان أنا مش طالبة صدقة، أنا كنت بطلب دعم يليق بتاريخ شيكا وولائه للنادي".

وأضافت: "سمعت بعد كده إن في عضو إدارة حضر العزاء ومشي، ومعرفتش حتى مين هو… وكان في كلام عن تعييني في وظيفة بالنادي من غير مرتب، بس أنا مش كنت طالبة وظيفة، أنا كنت عايزة جوزي يعيش بكرامة، ويشيل بيته".

عزاء ووجع وبقايا من الكرامة

لم تُخفِ هبة مرارتها من التجاهل الذي تعرّض له زوجها حتى بعد الوفاة، وقالت بصوت مرتجف: "أنا اللي جوايا وجع مش عارفه أطلّعه. كان نفسي حد يعترف إنه تعب، إنه كان بيحارب، إنه كان بيستحق حياة أكرم من كده".

واختتمت حديثها برسالة إنسانية مؤثرة: "كنت بدعي ربنا يشفيه، ودلوقتي بدعي له بالرحمة… ربنا رحم شيكا من ظلم كبير ونفاق أكتر. هو كان طيب، وبيحب الناس، بس ما لقاش الحب اللي يستحقه في الآخر".