سلوى عثمان: "مبسوطة بشخصية أوسة ورمضان من غير محمد سامي ناقصه كتير" |حوار
أثارت الفنانة سلوى عثمان الجدل بظهورها الملفت في مسلسل كلهم بيحبوا مودي، حيث أنها للمرة الأولى تظهر في مسلسل كوميدي، وتجسد دور امرأة شعبية، وبرز نجاحها بشكل كبير في المسلسل خاصة بعد الكيميا التي ظهرت بينها وبين طاقم العمل، وأجرى موقع نيوز رووم مع سلوى عثمان حوار صحفي للكشف عن تفاصيل وكواليس شخصية أوسة.
وإليكم نص الحوار:
س: كيف أستعدتي لـ مسلسل كلهم بيحبوا مودي؟
ج: بقرأ الورق وبركز في البروفات والملابس ومخوفتش أخرج من الحزين لابد على الممثل أن ينوع في اختياراته، ولا يظل طوال الوقت على وتيرة واحدة وهي شخصية مصرية شعبية فحوالينا كتير منها.
س: حدثينا عن كواليس المسلسل وخاصة مع ياسر جلال وأيتن عامر وميرفت أمين؟
ج: الكواليس كانت جميلة كنا كلنا مفرفشين من كتر الضحك والهزار وكل الناس حابة المسلسل وكلنا صحاب أصلا، ميرفت أمين قمة في الرقي والتعامل بلطافة ودمها خفيف بجد، وحبيت الكواليس جدًا فعلا.
س: كيف جاء اختيار الملابس والمكياج وطريقة التعامل كامرأة شعبية؟
ج: الاستايلست ايمان التونسي كانت فاهمة كويس طبيعة الشخصية وعملتلنا لبس حلو اوووي واللبس الشعبي مش حاجة صعبة خالص لأن شكله جميل ومريح، كنت بتكلم بطبيعتي وبتلقائية جدًا، ومفردات الكلام كان معانا أيمن سلامة هو اللي بين شخصية كل واحد فينا، أحنا بنخش جوا الشخصية دون أن نشعر بعد الحفظ.
س: اتوجهت انتقادات كتير لياسر جلال بما أنه نائب في مجلس الشيوخ والمفروض يبتعد عن تقديم هذه النوعية، ما تعليقك؟
ج: ياسر جلال محترم جدًا وعامل شخصية محترمة ليس بها ابتزال، ولما دخل مجلس الشيوخ معروف أنه فنان وبيقدم أدوار مختلفة، وأكيد هو رجع للمسئولين في مجلس الشيوخ قبل ما يكمل المسلسل وهما عارفين دوره ايه والمسلسل بيحكي عن ايه.
س: ما رأيك في ردود الفعل على شخصية أوسة؟
ج: متباينة كل واحد برأيه، في ناس مبسوطة جدًا وناس بتنتقد كل حاجة.
س: ما الرسالة التي تريدي توجهيها للبنات من مسلسل كلهم بيحبوا مودي؟
ج: البنات مختلفين ولكل واحدة اختيارها في شريك الحياة، في بنات متدلعة وبنات قد المسئولية زي شوقي "ايتن عامر"، فبقولهم أنهم يركزوا في الأختيار على الحاجات اللي تدوم مش الفلوس أو الشكل أو غيره.
س: بالنسبة لـ مسلسل اب ولكن كيف تعاملتي مع المخرجة بعد الأزمة الأخيرة؟
ج: الموضوع انتهى ومضطرين نخلص شغلنا بس بعد المسلسل كل واحد هيبقى في حاله، ومش هتعامل معاها تاني.
س: ما الشخصية الأقرب من شخصية سلوى عثمان، شخصيتك في كلهم بيحبوا مودي أم في أب ولكن؟
ج: كل دور عملته فيه من سلوى عثمان حاجة في وقت ببقى عايزة اضحك فبطلع شخصية أوسة، حياتنا مش على رتم واحد فكل شخصية ليها جزء جوايا .
س: من وجهة نظرك هل فعلا الاباء اللي بيطلقوا بيتعرضوا لظلم بسبب قانون الرؤية وهل شوفتي حالات مثل هذه؟
ج: أكيد طبعا، القاضي لما بيحكم في قضايا الرؤية بيشوف مدى اهتمام الأب برؤية ولاده وانها مش مجرد قاعدة في جنينة، بالعكس هو عايز يقضي وقت مع ولاده.
س: ما رأيك في الموسم الرمضاني دون وجود محمد سامي؟
ج: ناقصه كتير لأنه كان مخرج حابب مهنته وحابب الممثلين، شهادتي مجروحة فيه لأن كل شغلي كان معاه وعلى المستوى الانساني بحبه جدًا، ان شاءالله يرجع يكسر الدنيا بأعماله ومنتظرة اشوفه بيمثل في مسلسل قلب شمس مع مدام يسرا.
س: أيهما تفضلي المسلسلات المكثفة 15 حلقة أم المسلسلات الطويلة 30 حلقة؟
ج: كلهم حلوين المهم الأحداث وميكنش فيه ملل، شوفت قبل كده مسلسل الليلة واللي فيها بتاع زينة كان ست حلقات بس كان مكفي وموفي.
