«جوزك مسحور».. ياسمين عز في رسالة لربات البيوت
قالت الإعلامية ياسمين عز، للسيدات المصرية: «لما تكون ملوخيتك ساقطة ورزك شايط ومعجن متروحيش تقولي للناس ده جوزي بيعشقني ويعشق أكلي، ده بياكل صوابعه وراه، لا ده جوزك مسحور يا شيماء».
وأضافت عز، خلال حلقة من برنامج كلام الناس المذاع على قناة إم بي سي مصر: « لأنه الملوخية بتاعتك ساقطة وعبارة عن سائل مخاطي هلام بيمشي فيه حاجات خضرا لأنك بتجيبي ملوخية ناشفة من هنا عندنا».
وتابعت: « الست الأصيلة تخطف رجلها وهي صايمه للفيوم تقطف لجوزها أوراق الملوخية وترجع تطبخها سواء من الفيوم أو من إلمنيا أيهما اقرب اللي رجلك تجيبها».
وفي سياق أخر، وجهت الإعلامية ياسمين عز ، رسالة إلى ربات المنازل، بشأن تفريزات وخزين شهر رمضان، مؤكدة أن الأيام الأخيرة تتوجه ربات المنازل إلى تفريز الطعام وتغليفها من أجل الاستعداد لشهر رمضان المبارك.
وقالت عز، خلال برنامج «كلام الناس» المذاع على قناة إم بي سي مصر: «أرجوكي يا شيماء بلاش توم في الأكل ليه كمية التوم اللي فرزتيها اليومين اللي فاتو دي كلها، خلصتي مخزون الأردن من الثوم، وهيستوردوا الثوم من بعدك يا شيماء».
وتابعت: «الدول المجاورة بقوا بيتريقوا علينا بسببك يا شيماء فأرجوكي كفاية ثوم في الأكل».
وفي سياق أخر، تحدثت الإعلامية ياسمين عز، عن التعديل الوزاري المرتقب، قائلة: «مين مكمل ومين ماشي في التعديل الوزاري الجديد، فيه أقاويل إن الدكتور مصطفى مدبولي، رئيس مجلس الوزراء مكمل وأنا مع استمرار الدكتور مصطفى مدبولي وإحنا عشرة و فاهمين بعض وكل الملفات بقت معاه وهو متحمل مسؤولية كبيرة الله يعينه الراجل اكيد مش بينام».
ياسمين عز تكشف تكهنات عن التعديل الوزاري
وأضافت عز، خلال حلقة اليوم من برنامج «كلام الناس» المذاع عبر شاشة إم بي سي مصر: «الحكومة لسا معملتش الاجتماع الأسبوعي بتاعها ودي أول مرة تحصل خصوصا إن الدكتور مصطفى مدبولي في مصر ومش مسافر، وغالبا الحكومة الحالية مش هتعمل اجتماع تاني والاجتماع الجاي هيكون بالتشكيل الجديد».
وتابعت ياسمين عز: « وفيه كلام إن الفريق كامل الوزير مكمل في وزارة النقل، وفيه أقاويل عن فصل وزارة الصناعة عن وزارة النقل، و كمان ممكن التعديل ما يبقاش فيه كل الوزارات، لكن في وزراء كتير متوقع يكملوا زي وزيرالتربية والتعليم ووزير الشؤون النيابية وحقيقي ده يستحق عن جدارة إنه يكمل هو رجل دؤوب وحاضر طول الوقت، كمان متوقع أن الدكتور بدر عبد العاطي يكمل وهو حقيقي عامل شغل عظيم كمان احتمال إن وزير الأوقاف يكما معانا».
