ياسمين عز: خلي ابنك يرسم على وشك وشغلي دماغك عليه بدل ما بتشغليها على جوزك

 قالت الإعلامية ياسمين عز: « فيه أفكار كتير لألعاب للأطفال، أنا كنت بلعبها وطلعت عبقرية، لو كنت شديت حيلي كنت طلعت رائدة فضاء، لكن أنا ذاكرت اللي يخليني مذيعة».

وأضافت، خلال حلقة اليوم من برنامج «كلام الناس» المذاع عبر شاشة إم بي سي مصر:«العبي معاهم السلم والتعبان انتي السلم وابنك التعبان، هاتي لابنك مكعبات وصياد السمك، فين الحاجات أم زمبلك والراجل اللي كان راكب على الحصان، حتى لو هيكسر اللعبة بس خليه يتبسط».

وتابعت:«خليه يرسم على وشك انتي كأم تستحملي ابنك.. مش بهزر دي هواية، أدعمي هوايات ابنك، أو هاتيله لعبة نط الحبل، أنا لسا جايبة نط الحبل وبنط في البيت لما بكسل أروح الجيم».

وأردفت:«أنا وانا عندي خمس سنين كانت أمي بتقولي أحفظ أسماء الله الحسنى علشان أخد خمسة جنيه، وجريت حفظتها ولحد النهارده عمري ما انسى ده، دي مس مقايضة دي حماس كنت باخد خمسة جنيه لما بعمل حاجة».

واختتمت: «بدل ما تشغلي دماغك على جوزك شغلي على دماغك علشان ابنك بدل ما تخططي ازاي تقفشي جوزك، أنت الحمل تقيل ونساكي الولاد العبي معاهم وخليهم يقبلوا الدنيا».

وفي وقت سابق، وجهت الإعلامية ياسمين عز مجموعة من النصائح للزوجات تزامنا مع موجة البرد التي تشهدها البلاد حاليا، مؤكدة على ضرورة تضحية الزوجة بدفئها في سبيل راحة زوجها، وذلك خلال برنامجها «كلام الناس» المذاع عبر شاشة «MBC مصر».

الجو صهد زمهرير صقيع

ووصفت ياسمين عز حالة الطقس الحالية قائلة: «الجو يا جماعة برد اليومين دول.. الجو برد صهد زمهرير ورياح وصقيع، مسمعش واحدة ست تقول لجوزها قوم استحمى.. الزوجة الأصيلة لازم تستحمى بدل جوزها في الشتا وتخليه هو مدفي.. أمال انتي دورك إيه في الحياة كزوجة؟.. انتي تسقعي وهو يدفي».

كوباية الماية واللحاف

وتابعت ياسمين عز: «متسيبيهوش يغسل كوباية.. انتي اغسليها ونشفيها ومش بس كدة، متدلوش الكوباية ساقعة لا، تفضلي تنفخي فيها لحد ما تسخن وتبقى دافية بعدين تديهاله»، مواصلة: «الزوجة الأصيلة تسيب اللحاف كله لجوزها يتغطى بيه ويتكلفت، انتي شوفيلك ملاية أو نامي لابسة تقيل وخلاص».

انتي مش أم كلثوم

واعتبرت ياسمين أن مرض الزوجة بسبب البرد شرفا، قائلة: «ولو بردتي وانتي نايمة أو صحيتي عندك برد كفاية فخر إنك بردتي في سبيل دفا جوزك أبو عيالك.. صوتك يروح مش مهم انتي مش أم كلثوم يا مدام».

وأكملت: «ولو جسمك بيوجعك من البرد ماتاخديش مسكن لأن المسكن والمادة الفعالة نايم جنبك على السرير وهو زوجك، يحط إيده عليكي يسقط الوجع.. المهم جوزك يفضل دفيان لأنه شقيان»، مواصلة: «الست بنت الأصول تنام لابسة شراب عشان لو رجليها المتلجة خبطت في رجل جوزها متصحهوش من النوم مفزوع».