ياسمن عز عن رئيس مجلس الوزراء: الله يعينه أكيد الراجل مش بينام
تحدثت الإعلامية ياسمين عز، عن التعديل الوزاري المرتقب، قائلة: «مين مكمل ومين ماشي في التعديل الوزاري الجديد، فيه أقاويل إن الدكتور مصطفى مدبولي، رئيس مجلس الوزراء مكمل وأنا مع استمرار الدكتور مصطفى مدبولي وإحنا عشرة و فاهمين بعض وكل الملفات بقت معاه وهو متحمل مسؤولية كبيرة الله يعينه الراجل اكيد مش بينام».
ياسمين عز تكشف تكهنات عن التعديل الوزاري
وأضافت عز، خلال حلقة اليوم من برنامج «كلام الناس» المذاع عبر شاشة إم بي سي مصر: «الحكومة لسا معملتش الاجتماع الأسبوعي بتاعها ودي أول مرة تحصل خصوصا إن الدكتور مصطفى مدبولي في مصر ومش مسافر، وغالبا الحكومة الحالية مش هتعمل اجتماع تاني والجتماع الجاي هيكون بالتشكيل الجديد».
وتابعت: « وفيه كلام إن الفريق كامل الوزير مكمل في وزارة النقل، وفيه أقاويل عن فصل وزارة الصناعة عن وزارة النقل، و كمان ممكن التعديل ما يبقاش فيه كل الوزارات، لكن في وزراء كتير متوقع يكملوا زي وزيرالتربية والتعليم ووزير الشؤون النيابية وحقيقي ده يستحق عن جدارة إنه يكمل هو رجل دؤوب وحاضر طول الوقت، كمان متوقع أن الدكتور بدر عبد العاطي يكمل وهو حقيقي عامل شغل عظيم كمان احتمال إن وزير الأوقاف يكما معانا».
واختتمت: «خلال ساعات أو أيام هيكون في تعديل وزاري، قبل رمضان علشان يستعدوا، ومتوقع بعدها يكون في تغير في المحافظين كمان، لكن حتى الآن ده اللي عرفناه أو التكهنات اللي عرفناها».
وفي سياق متصل، قالت الإعلامية ياسمين عز: «من امبارح شوفت فيديوهات كتير عن النائبة يارا عزت، ظهرت في فيديو اتوترت في لجنة النواب وهي بتتكلم عن أحد القوانين، ونزل عنوان ونزل حاجات كتير بتقول انها بتستخدم الذكاء الاصطناعي في شغلها، معرفش إيه العنوان المستفز ده».
ياسمين عز تدافع عن النائبة يارا عزت
وأضافت، خلال حلقة اليوم من برنامج «كلام الناس» المذاع عبر شاشة إم بي سي مصر: «في إيه مالكم في مواقع مش لاقية حاجة تكتبها بتنتقد وبس، يا جماعة لازم ندي فرصة للشباب، متنتقدوش الشباب خلوهم يعرفوا ينجحوا ويشوفوا شغلهم سيبوها هي لسا بتحط رجلها على أول سلمة، أنا مش فاهمة ليه التريقة، مبحبش كلمة تنمر اسمها تريقة بتتريقوا عليها ليه؟».
وتابعت: «هي نائبة مش مذيعة ولا مدرسة لغة عربية علشان تقرأ المظبوط ومش دور حد قاعد ورا الموبايل يكتب أي حاجة، مش كل يومين على السوشيال ميديا نلاقي تريقة على النواب السيدات، هي أكيد انزعجت مش مفروض نقول كدا المفروض نكون أكثر احترام، أنا بشوف ناس في مناصب كبيرة بيتوتروا عادي جدا وفي ناس كبيرة عملت معاها لقاء بيبقى الشخص قمة وسلطة بيعرق ووشه يبقى أحمر من رهبة الكاميرا في رهبة كبيرة، لكن هو في منصبه بيعمل دوره، إحنا مش بنقيم شكل أو منظر إحنا لازم نقيم شغل على أرض الواقع، هي بتعمل اللي في مصلحة المواطن، لما تعمل حاجة ضدك ابقى هاجم إنما هي بتقرأ بتقرأ زي ما هي عايزة حتى لو هتقول الجمل معكوسة».
وأردفت: «مش أي حد هياخد منصب لازم ياخد كورس إلقاء دي قدرات في ناس متعودة وناس لا. أنا دلوقتي محدش بيعرف يسكتني لما اتكلم بس وأنا في أولى جامعة كنت خجولة جدا، وبعدين العلم في الراس مش الكراس هي لو مش ذكية ولا تستحق مكانها مش هتاخده، متقيمهاش وانت قاعد بالبيجامة ده ميصحش أنا لما أنتقد بيكون في حاجة غلط إنما كده غلط».
و اختتمت: « إيه موضوع اقعدي في البيت والمطبخ دي!!! ما تقعد أنت لو فاضي وعايز تنتقد يبقى أنت اللي المطبخ أولى بيك مش هي بتشتغل، وحقيقي أنا لو أقدر اعتذر لها عن كل الناس دي هعمل ده، أكيد الست تضررت هي مستفزتش حد علشان نعمل كده».
