محمود سعد يكشف عن معاناة ملايين المغتربين: «بنكافح عشان لقمة العيش»
تحدث الإعلامي محمود سعد عن ملايين المصريين المغتربين المقيمين في الخارج، قائلا: «محدش عنده إدراك يعني أي واحد سايب وطنه ومسافر برا، على فكرة معظمهم مش دكاترة ومهندسين ودارسين قانون، في شق منهم ناس بتكافح كفاح مرير والغربة بتمتصهم وتعصرهم عصر».
إدراك قيمة الغربة
وأضاف خلال فيديو على منصة «X»: «لا بد من إدراك قيمة الغربة، بمعنى معرفة ماذا تسبب الغربة لصاحبها، شيء رهيب وفي منتهى الصعوبة، يعني المغترب بيسيب أسرته وعيلته ويغترب ويقعد يكافح، وبيعيش في أوضة فيها 9 أنفار وبياكل أكل قليل جدا عشان يحوش قرشين، بالتالي أقل واجب نعمله إننا نساعدهم على أد ما نقدر».
المغتربين نماذج مكافحة
وتابع: «بفرح لما بيكون في مشروع بس أراضي مميزة ياخدها المصريين في الخارج، مش عشان بيدخلولنا فلوس ولا عشان بيمثلونا برا، دا عشان بيعملوا جهاد».
وواصل: «90% من المواطنين في مصر في الداخل بيكافحوا عشان لقمة العيش، لكن الكفاح دا مع غربة وفيها بلاد مختلفة ونوعية البشر مختلفة في اللي بيقدرهم وبيحترمهم وفي اللي بيهينهم وبياخد جواز السفر ويحبسوهم، في اللي بينجح ويحقق إنجازات، بالتالي لازم لما ييجي وطنه يبقى حاسس إننا بنحضنه ونطبطب عليه ونقوله متشكرين مش عشان العملة الصعبة لأ عشان نموذج مكافح».
وأردف: «زي ماحنا عندنا دعم للمواطن الداخلي وبنعمله ونوفره مميزات زي سكن اجتماعي وبطاقات تموين، طب واللي في الخارج دا ملهوش نصيب؟».
اللعب في مشاعر المغترب
وأكد خلال فيديو على منصة «X»: «هو أي حد ركب طيارة خلاص بقى غني؟، دا مش حقيقي، لأن اللعب في مشاعر المغترب حاجة صعبة جدا واسألوا دكاترة علم النفس».
كفاح ملايين المصريين
وتابع «دا واحد ضربه السلك ومعرفش يشتغل، لأن مفيش واحد هيكون شغال هنا كويس وهيروح يشتغل في الخارج، احنا بناخد الزبدة والقشطة بتاعتهم اللي هما الدكاترة والمهندسين والمشهورين ونعتبر دول المصريين في الخارج، لأ مينفعش لأن في ملايين المصريين بيشتغلوا برا وبيكافحوا ويتبهدلوا ويدفع جمرك، التعامل معاهم على أنهم مصدر دخل».
لعب في السياحة
واختتم «في لعب في السياحة، داحنا بنترجى والدولة بتعمل مجهود كبير في إنها تفتح مجالات للسياحة لأن العدد اللي بيجيلنا من السياحة لا يناسب على الإطلاق الآثار اللي عندنا، احنا عندنا آثار ملهاش أول من آخر، في دول عندها 10% من آثارنا وبيدخلها 70 و80 مليون سائح كل سنة، واحنا نلعب في سكة السياحة؟، في مناطق ميصحش اللعب فيها».
