بالأسماء..ابنة يوسف شعبان تحسم الجدل حول عدد زيجاته وحقيقة زواجه من «الشحرورة»

كشفت زينب، ابنة الفنان الكبير الراحل يوسف شعبان، عن تفاصيل علاقات والدها الزوجية والدور المحوري الذي لعبته والدتها في حياته لـ3 عقود، واصفة إياها بأنها كانت القوة الدافعة والهدوء الذي يحتاجه النجم خلف الكاميرات.

سر الـ 30 عاما

وأكدت زينب خلال لقائها ببرنامج «كلمة آخيرة» المذاع على شاشة «ON» مع الإعلامي أحمد سالم، أن والدتها كانت السند الحقيقي له، موضحة: «ماما حوار تاني، وأنا أفتخر بيها لأنها كانت سند لبابا طول الوقت، هي يعتبر الجندي الخفي اللي محدش كان يعرفه».

وأضافت زينب أن والدها رغم هيبته وقوته، كان يجد راحته في استشارة والدتها في أدق تفاصيل عمله، متابعة: «يوسف شعبان مبيجيش عندي أنا ويضعف عشان أنا بنته.. لأ..هو كان فعلا مع ماما حوار تاني، يناقشها في كل الحوارات اللي كانت بتحصل.. يعني مش هو كان بياخد أي قرار لوحده.. كان دايما يهتم برأي ماما».

وأشارت إلى أن هذا التعاون كان مثيرا للإعجاب، خاصة وأن والدتها بعيدة تماما عن مجال الإعلام، مواصلة: «كانت علاقة لذيذة أوي إن أنا أشوف العيلة إزاي إحنا كلنا محبين للإعلام مع إن ماما مش مع الكاميرا ولا إعلامية».

حقيقة زيجات يوسف شعبان الأربعة

وأكدت زينب أن والدها تزوج 4 مرات رسميا فقط، وهم: «أول مرة طبعا كانت ليلى طاهر وطلق.. طبعا هم قعدوا فترة صغيرة بردو، وتاني مرة كان ثرية من من الأهل يعني من المعارف وكده هما اللي تجوزوا وكان جاب منها عز اللي هو أخويا وبردو طلق، وكمان حفيدة الملك فاروق ودي اللي خلف منها لنته سينا وبعدين انفصلوا»، وأخيرا والدة زينب وهي الزيجة الأخيرة والأطول عمرا، حيث استمرت 30 عاما حتى وفاته.

رد حاسم على شائعات الزواج من صباح وسهام فتحي

ونفت زينب ما تردد من إشاعات حول زيجات أخرى لوالدها من الوسط الفني، خاصة الفنانة صباح والفنانة سهام فتحي، قائلة: «مفيش سهام فتحي ولا صباح زي ما الناس بتقول.. كان في فنانين كتير قالوا إن هو كان متجوزهم بس لأ».

وروت موقفا تعرضت له بسبب شائعة زواجه من صباح، قائلة: «مثلا الفنانة صباح الله يرحمها كانوا قايلين برضه الإشاعة دي فـ لما هي توفت كانوا داخلين يقولولي أنا البقاء لله أنا خفت أنا مكنتش عارفة ده على مين».