صابرين جابر لـ نيوز رووم: ملل المرأة.. النهاية الصامتة لأي علاقة
يعد الملل في العلاقة العاطفية هو حالة من الركود والفتور تنشأ غالباً بسبب الروتين، غياب التجديد، أو تراكم المسؤوليات، أو الإهمال وكثرة المشاكل بين الطرفين ويعد مرحلة طبيعية في العلاقات طويلة الأمد.
في سياق متصل علقت خبيرة العلاقات الأسرية صابرين جابر لـ موقع نيوز رووم عن ملل المرأة في العلاقة.
ملل المرأة.. النهاية الصامتة لأي علاقة.
تقول صابرين جابر: كتير بنسمع ونتكلم عن ملل الرجل في العلاقة وعن زهقه وعن رغبته في التجديد لكن ما حدش اتكلم بجد عن ملل المرأة وعن اللحظة اللي فيها المرأة بتسكت وبتحاول تبعد وبس من غير ما تقول كلمة ولا تبرر.
الهدوء هنا مش انها تمشي وتقول سلام ده إنذار صامت بيبقي أخطر من أي صراع أو عتاب.
المرأة ما بتملش من الحب ما بتملش من الشخص نفسه هي بتمل من غياب الأمان العاطفي.
الأمان العاطفي يعني إنها تحس إنها مهمة ومسموعة وموجودة فعليا مش بس بجسمها ولما الإحساس ده يختفي المخ يبدأ يشتغل على الحماية مش الحب.
الملل عند المرأة غالبا نتيجة تراكم طويل:
_ تجاهل متكرر.
_مجهود من طرف واحد.
_وعود اتقالت وما اتنفذتش.
_شعور إنها لوحدها حتى وهي جوه العلاقة.
علميا لما الإنسان يعطي كتير وما ياخدش المخ يبدأ يقلل التوقعات والانسحاب العاطفي يبدأ وده أخطر شيء لأنه بييجي من جوه من عقلها وقلبها مش من صراخها أو غضبها.
الهدوء هو أخطر إشارة:
لما المرأة تبطل تعاتب تبطل تحكي تبطل تتوقع ده معناه إنها بطلت تصدق والمرة اللي بعدها قلبها ممكن يكون انسحب تماما .
_تأثيره النفسي:
-الملل العاطفي المزمن ممكن يسبب قلق واكتئاب خفيف شعور بالوحدة.
-أول حاجة بتموت في العلاقة المهملة هي الأمان النفسي مش الحب.
-الاعتذار من غير تغيير يزيد الملل مش يقلله.
نصايح للرجل قبل ما توصل الأمور هنا:
-اسمع أكتر من ما تتكلم.
-كون حاضر فعلا مش بس موجود.
-الأفعال الصغيرة بتفرق أكتر من الكلام الكبير.
_افهم إن الاحتواء مش ضعف ده أهم حاجة لأي علاقة.
كلمة أخيرة للرجل:
لو وصلت المرأة لمرحلة الملل مش لأنها زهقت من الحب مش لأنها عايزة تعاقبك هي بس اختارت راحتها النفسيه .
اختارت إنها تحمي قلبها بكل هدوء من غير ما تقول اي كلام من غير ما تدي فرصة تانية
لو ما فيش تغيير حقيقي.
اللي اتعودت تتحمل مش معناها إنها هتستحمل دايما.
المرة دي هي ماشيه على خطة واضحة: تحافظ على نفسها قبل أي حد تاني.
والمؤسف إن أغلب الرجال مش بيفهموا إشاراتها وبالتالي يفتكروا إن كل شيء تمام لحد ما تصدمهم النهاية الصامتة.
المرأة اللي وصلت للملل بتبطل تنتظربتبطل تصدق بتبطل تعطي فرص زيادة وبتبدأ تشوف قيمتها بعيد عن كل اللي كان بيتقال .
كل كلمة اعتذار من غير تغيير؟ بتتنسى.
كل وعد اتقال وما اتنفذش؟ بيتحول لجرح طويل كل لحظة تجاهل تخلي أي رجوع محتاج مجهود حقيقي مش مجرد كلام.
الرجل اللي عايز يحافظ على المرأة لازم يعرف حاجة مهمة جدًا:
الحب مش مجرد كلام.
الحب هو فهم هو حضور هو اهتمام حقيقي هو أفعال صغيرة يومية بتثبت وجودك.
المرأة مش محتاجة هدايا فخمة أو كلام جميل هي محتاجة قلبك يكون موجود فعلا يكون موجود قبل ما توصل للصمت النهائي قبل ما ييأس قلبها قبل ما يقرر أنها تمشي وتسيب كل شيء وراها.
لو بتحبها صح اسمعها قبل ما تتكلم حس بيها خليك حاضر قبل ما تحس إنها اختارت الطريق الأخير لأن اللحظة دي مش رجوع ده اختيار واعي وحاسم.
المرأة اللي توصل للملل بتكتب النهاية قبل أي حد وبكل هدوء بتقول لنفسها أنا أهم من أي علاقه مؤذيه واهم من اي حد مايعرفش قيمتي .
