قالي هننقل سماد.. اعترافات المتهم بمساعدة والده في التخلص من جثة شقيقه|خاص

كشفت تحقيقات النيابة العامة في القضية رقم 17045 لسنة 2025 جنايات سمالوط غرب، والمقيدة برقم 2514 لسنة 2025 كلي شمال المنيا، والمتهم فيها "جمال.م"، بقتل نجله بسبب تعاطيه المخدرات وتشاجره الدائم مع الأهالي والجيران، حيث انتهز فرصة تعمق نجله في النوم، وتعدى عليه بقطعة حديدية على رأسه، ما أودى بحياته. 

اعترافات المتهم بمساعدة والده في التخلص من جثة شقيقه بالمنيا

وحصل موقع «نيوز رووم» على نص التحقيقات من أقوال المتهم «هشام.ج » شقيق المجني عليه والتي جاءت كالتالي:

س: ما هي تفصيلات إقرارك تحديداً ؟

ج: اللي حصل أن أنا كنت مسافر المنصورة شغال هناك في مزرعة بهايم والجماعة كانوا بيرنوا عليا ويقولولي إن أخويا مصطفي عامل مشاكل كثيره في البلد، فنزلت البلد من حوالي أربعة أيام وعرفت أن مصطفي أخويا كل يوم والثاني عامل مشكلة مع حد وبيهدد أبويا وامي إنه هيموتهم وكان بيروح يبات مع أبويا في البيت وأي حد من ولاد عمي كان بيروح يبات معاه عند أبويا عشان ياخدوا بالهم منه وأبويا وامي اخدوه كشفوله في المنيا وكانوا عاوزين يدخلوه مصحه عشان المخدرات اللي هو بيشربها. ويوم الخميس كان أخويا مصطفى بايت عند أبويا وانا رحت قضيت معاهم اليوم كله ولما مصطفي دخل ينام رجعت أنا على بيتي حوالي الساعة 11 بالليل.

وتابع لقيت أبويا بيرن عليا حوالي الساعة 2 بالليل وقالي هات التروسكل بتاع جوز أختك وتعالي ليا البيت ولو سألك قوله هننقل بيه شوية سماد. فرحت لجوز أختي بيته ورا بيتي أخدت منه مفاتيح التروسكل وأخذت التروسكل ورحت لأبويا البيت رنيت الجرس وأبويا طلع فتحلي الباب ودخل لجوه فمشيت وراه لحد ما لقيت أخويا مصطفي واقع على الأرض في الصالة قدام المطبخ ومتعور في راسه وتحته دم كثير على الأرض فأغمي عليا أول ما شفته ووقعت في الأرض. وبعد كده أبويا فوقني وقالي إن مصطفى اتهجم عليه بسكينه وطلب منه فلوس أو يموته وقاله إنه مش عاوز يروح المصحة وأبويا حاول يهديه بس معرفش فضربه على راسه وحصل اللي حصل.

وأضاف بعدين أبويا دخل جاب جوال بلاستيك ولف بيه مصطفى أخويا وشاله لوحده وحطه في الصندوق بتاع التروسكل وقاللي تعالى سوق التروسكل عشان أبويا مش بيعرف يسوق، فقمت دورت التروسكل وأبويا ركب جنبي وقاللي اطلع بينا على قرية الشيخ تلاده نرمي الجثة في البحر اليوسفي ونرجع. فرحت على هناك ووقفت بالتروسكل جار البحر وأبويا نزل شال مصطفى أخويا من صندوق التروسكل ورماه في البحر ورجعنا على البيت عند أبويا، نزلته وقالي روح أنت رجع التروسكل مكانه وارجع بيتك، وتاني يوم صحيت فضلت قاعد في البيت بتاعي لحد ما الحكومة جتلي البيت حوالي الساعة 8 بالليل وأخذوني من قدام بيتي على بيت أبويا وكانت الحكومة كلها هناك وأخذوني أنا وأبويا على المركز سألوني عن اللي حصل وحكتلهم على اللي أنا اعرفه وفضلت هناك لحد ما جابوني على هنا وده كل اللي حصل.

س: متى و أين حدث ذلك؟

ج: الكلام ده حصل يوم الجمعة الموافق ۱-۲۰۲۵۸ حوالي الساعة ٢ صباحا - في بيت ابويا بقرية منشية بديني - مركز سمالوط غرب.