لا يصح إلا الصحيح.. تعليق دانا حمدان على انحدار محتوى السوشيال ميديا
خرجت الفنانة دانا حمدان عن صمتها من خلال مقطع فيديو عبر حسابها الرسمي على موقع تبادل الصور والفيديوهات إنستجرام، لتوضح لجمهورها سبب انحدار المحتوى المقدم على السوشيال ميديا.
حيث قالت دانا حمدان في هذا الفيديو: “شوفت سؤال على السوشيال ميديا أن ليه صناع المحتوى يتقبلوا كل هذا الكم من الإهانات والشتايم، وبما أني صانعة محتوى وفي العالم ده بقالي حبة حلوين، اسمحولي أرد على السؤال ده، انتشار السوشيال ميديا ابتدأ في ٢٠٢٠ مع قعدة الناس في البيت، الدنيا كانت ماشية تمام والمحتوى كان لطيف وكان في حالة من الانبهار، الدنيا بدأت تبوظ أول ما الماديات دخلت في الموضوع”.
تطور صناعة المحتوى
وعن بداية تطور صناعة المحتوى إلي إعلانات، قالت دانا حمدان: “لحد ٢٠٢٢ لاقينا نجاح وإنطلاق مبهر ومشاهدات خيالية لبعض صناع المحتوى، وبعض البراندات لاقوا أن دي فرصة هايلة للإعلان عن منتجاتهم، ولان ده مجال مفتوح مالوش تسعيرة مكنوش عارفين يحددوا المقابل يبقى قد ايه، واللي حصل أن صناع المحتوى طلبوا اللي هما عايزينه والشركات لبت، ومع النجاح بقوا صناع المحتوى يعلوا والشركات تلبي”.
دخول شريحة مختلفة من المجتمع
وعن بداية دخول شريحة مختلفة من المجتمع للمجال، قالت دانا حمدان: “مع بداية ٢٠٢٣ شريحة من المجتمع لاقيت أن دي فرصة للنجاح والشهرة والكسب السريع، فبدأوا يقدموا محتوى وللأسف ٩٩٪ منه كان سئ جدًا، ولأن دي كانت أول مرة شرايح المجتمع تدخل في دخليات بعض ونشوف بيوت بعض كان في حالة من الإنبهار، بجميع الطبقات والتفاصيل والخلفيات، وبقينا نعلي على بعض، والمشاهدات تعلى، وبقى في زيادة في الطلب على الشخصيات دول أيًا كانت طبقتهم، من بداية ٢٠٢٤ لاقينا كم فظيع من الشتايم، وبيدخلوا يغلطوا ويدخلوا ينتقدوا، واللي ورا الشاشة شايف أنه يتكلم ويقول اللي هو عايزه كده كده مش هيتمسك، وبقى عندنا عادي أننا نخوض في الأعراض وفي شرف الناس”.
“لا يصح إلا الصحيح”
واختتمت دانا حمدان حديثها قائلة: "لحد ما لله الحمد في بداية ٢٠٢٥ كان في شدة جامدة، وأنا متفائلة أن مجال السوشيال ميديا في تطور جامد، وهرجع اقولكم الوحيد اللي كسب هو الشخص اللي التزم بمبادئه ومنجرفش للهوجة اللي كانت حاصلة، وده يدل أنه لا يصح إلا الصحيح، والكسب السريع أخرته وحشة".
