في زمن بقي فيه كل حاجة على السوشيال ميديا بقت حياتنا كلها مقارنة مستمرة.
من غير ما نحس بنقيس نفسنا على غيرنا على نجاحهم على شكلهم على علاقاتهم على كل حاجة.
فيه ناس بنشوفهم ونقول لنفسنا: “ليه هو كده وأنا مش كده؟”
وبنقارن كل خطوة ناجحة عند حد تاني بحاجة ناقصة عندنا وده بيخلي القلب يتعب .
تعرف المشكله فين ؟
انك طول عمرك كنتي بتقارني نفسك مع ناس من دمك ولحمك (صاحبتك وبنت خالتك وزميلتك )
لكن دلوقتي انك بتقارني نفسك بناس مشفتهمش ولا هتشوفيهم ناس بتصور احلي 10 دقايق في يومهم الساعات اللي فيها خناق وزهق وضغوط عمرك ماهتشوفها
المقارنه مش بتوجعك لان الصوره حلوه لكن بتوجعك لانك بترجمها علي نفسك .
تشوف حد ناجح تسأل نفسك (طب وانا )
تشوف حد سافر (ليه أنا لأ)
تشوف علاقه مثاليه (عيبي أنا؟)
تفتكر إن المشكله فيك بس الحقيقه المشكله انك بتقارن قصه كامله عندك بلقطه واحده عندهم .
الحقيقه فين ؟
عارفه ان البنات اللي بتصور اللبس في المرايا ؟ اغلبهم بيعيطوا قبل ماينزلوا .
والصور المثاليه للكابلز ؟متاخده بعد خناقه مكسره الدنيا .
والضحك اللي علي البحر ؟ جه بعد شهور من العزله والكآبه.
والسفر ممكن يبقي هروب .احنا مابقيناش نقارن حياه بحياه احنا بنقارن مشهد بواقع .
الأهم في الموضوع ان المقارنه بتسرق منك حاجتين كبار الرضا وراحه البال .
السؤال المهم …
ليه هو مرض العصر؟
-السوشيال ميديا بتكبر كل حاجة: الناس بس بتحط الحلو مفيش فشل مفيش تعب كله كماليات وسعادة.
وإحنا نقارن حياتنا الواقعية بالصور اللي على الإنترنت.
-الخوف من التأخر عن الناس: بنقارن عشان خايفين نكون ورا خايفين نكون مش كفاية وننسي إن كل واحد له وقته وظروفه.
-نسيان الذات: بدل ما نسأل نفسنا “أنا كويس؟ أنا سعيد؟” نسأل “الناس شايفة إيه عني؟
المقارنة مش بس بتجرح دي كمان بتخنق
بتسرق فرحتنا الحقيقية وبتخلينا دايمًا عايزين أكتر مفيش حد يقدر يستمتع بحاجة لما عقله مركز على اللي حواليه.
نصايح بسيطة تهدي الهوس ده
-ركزي على نفسك… اعملي مقارنة مع نفسك بس مش مع غيرك.
-حطي قائمة يومية لإنجازاتك مهما كانت صغيرة.
-قللي وقتك على السوشيال ميديا خصوصا الصفحات اللي بتعمللك شعور بالنقص.
-اتعلمي تقولي “أنا كويسة كده” واحتفلي بكل نجاح صغير.
النهايه ….
هوس المقارنة مرض العصر لأنه بيخلي كل حاجة حوالينا أكبر من اللي هي عليه… بيخلي قلبنا مضغوط وبيخلينا ننسى أهم حاجه نفسنا وحياتنا وسعادتنا الحقيقية.
