ياسر جلال: هتم 56 سنة وميبانش عليا لأن نفسيتي حلوة.. ونجومنا ثروة لازم نقومها
كشف الفنان ياسر جلال عن عمره الحقيقي، ردًا على متابع سأله عن عمره، مشيرًا إلى أنه سيتم عامه الـ 56 هذا الشهر، بجانب حديثه عن الهجوم الذي يتعرض له بعض الفنانين معبرًا عن استيائه الشديد لهذا الأمر.
وقال ياسر جلال في لايف عبر صفحته الرسمية بموقع فيس بوك: “عندي 56 سنة هتمهم شهر أبريل، لكن ميبانش عليا، والنفسية الحلوة هي السبب.. أنا مش بكره حد، بجانب أني بلعب رياضة، وطبعًا كرم ربنا قبل كل شيء.. مازحًا: "شكلي كده هتكفي على وشي لأنك بتقر عليا”.
عيني ووشي مش بتشوف غير الحلو
وأضاف: “في ناس بتحب تأذي من غير سبب، مش حلو تأذي حد بكلمة، تتريق عليه أو توجعه أو تألمه، الكلمة الطيبة صدقة، وأنا بيتقالي شكلك أصغر من سنك، وده لأن عيني ووشي مش بتشوف غير الحلو، لما أشوف حد سواء راجل أو ست بتكلم عن الحلو اللي فيه، الإنسان معجزة مليانة قوة وقدرات وجمال بس المهم نشوف الحلو اللي فيه".
وتابع ياسر جلال: “بشكر اللي قال عليا محترم، وأنا إنسان طبيعي بغلط وأتعلم من غلطي بشر يعني، الاحترام له مفهوم، أن الإنسان يتقن عمله ويراعي شغل الآخرين، ميأذيش حد، ويتقي ربنا في قلبه بأي صورة وبطريقته، وما يعتديش على الآخرين سواء بالقول أو بالفعل، ويحترم أفكار وعقائد الآخرين، وإحنا في الحياة الخاصة لينا أخطاء وأنا ليا أخطاء والواحد بيغلط وربنا بيسامح ومش بدعي أني مثالي وبحب بيتي وأسرتي وشغلي وزملائي”.
أنا متعصب لزمايلي وبزعل لما بلاقي فنان بيتهاجم
وأكمل ياسر جلال: “أنا متعصب لزمايلي وبزعل لما بلاقي فنان بيتهاجم، لو زعلان منه أو اضايقت من تصرف عمله أو عمل قدمه، أنا كجمهور أنصحه وأقوله اعمل كذا المرة الجاية، بلاش تكون قاسي عليه، لأن هو نيته في البداية ميضايقش حد، ممكن يكون شطح بخياله وأفكاره، والمفروض نقوم نجومنا لأنهم ثروتنا..وأنا بدافع عنهم لأني واحد منهم وبتشرف بده وليهم كل الحب والاحترام والدعم، وكلنا بنغلط، أطلب من الفنان بتاعك اللي بتحبه يقدم أعمال أفضل لكن ما تدبحوش”.
