مها بهنسي: الست مش عدوة الست.. المجتمع حطنا في منافسة طول الوقت!

علقت الإعلامية مها بهنسي على علاقة النساء ببعضهم البعض، مؤكدة على أن المجتمع هو من يضع المرأة تحت ضغط المنافسة، لافتة إلى أن المرأة حين تتقلد منصبًا تكون مضطرة لبذل مجهود مضاعف. 

وقالت مها بهنسي، خلال حلقة برنامج الستات مايعرفوش يكدبوا على شاشة CBC: «هل الستات بيكونوا هم السبب في صعوبة حياة بعض؟ يعني المديرة الست، الحما، أخت الزوج... هل دول اللي بيصعبوا الحياة على بعض؟ يعني الست عدوة الست؟». 

المجتمع من يضع المرأة تحت ضغط 

وأشارت مها بهنسي إلى أن المجتمع هو من يضع النساء تحت ضغط المنافسة منذ القدم، قائلة: « الخبراء قالوا إن الستات مش السبب الوحيد في صعوبة حياة البعض، لأن في بعض الأوقات بيكونوا أداة أو وسيلة للضغوط اللي المجتمع حاطط الست فيها من زمان».

اضطرار المرأة لبذل مجهود مضاعف 

وأضافت مها بهنسي أن المرأة حين تتقلد منصبًا، تضطر لبذل مجهود مضاعف لإثبات نفسها: «في الشغل بتكون مديرة قوية عشان تقدر تثبت نفسها في وسط العالم الذكوري، وإن هي تقدر وتقدر وتقدر... تعمل الشغل على أكمل وجه زي الراجل بالضبط»، مشيرة إلى أنه: «لو حما، بتلاقيها برده بتشد شوية على بنتها أو على حياة ابنها، علشان عايزاها تكون مظبوطة، يعني على المسطرة زي ما بيقولوا». 

وفي سياق آخر، كشفت الإعلامية مها بهنسي، عن أن الإعتماد على السوشيال ميديا يؤثر على نظرة الناس للزواج والعلاقات، مؤكدة أن كل مايوجد على وسائل التواصل الاجتماعي ليس حقيقيًا، وهناك الكثير يدعون السعادة أمام الجميع، قائلة: "كل اللي على السوشيال ميديا مش حقيقي.. ناس كتير بتدعي السعادة المطلقة، وده مش صح، بيتجملوا طول الوقت، لأن استحالة حد هيطلع يقول إنه بائس، إلا لو عايز يتسول.. وده موضوع تاني".

وأضافت مها بهنسي، خلال برنامج الستات مايعرفوش يكدبوا المذاع على شاشة قناة السي بي سي: "حتى قبل السوشيال ميديا، الناس كانت بتتجوز إزاي؟ والجوازات كانت بتعمر سنين، فالمشكلة مش في الجواز، المشكلة في الصورة اللي بتتشاف".

السوشيال ميديا لا تُظهر إلا جزءًا صغيرًا جدًا من حياة الناس

ومن جانبها، أكدت الإعلامية هبة الأباصيري أن السوشيال ميديا لا تُظهر إلا جزءًا صغيرًا جدًا من حياة الناس، وغالبًا ما يكون بعيدًا تمامًا عن الواقع: "الناس بتحب تطلع نفسها أبطال ومضحين وبؤساء، وده كله بيستنزف طاقتك... وأنا ضد تمامًا إن حد يتعرف على حد من السوشيال ميديا ويتجوزه، حتى لو اتجوزوا، بنعرفهم في الحقيقة، وبيطلعوا مش كويسين".