ياسين جديد بدمياط.. شاب يعتدي على طفل والأم:« ابني اتكسر من جوه»
داخل منزل بسيط بقرية كفر المياسرة التابعة لمركز الزرقا بمحافظة دمياط، جلست «نيوز رووم» مع والدي طفل صغير لم يتجاوز السادسة من عمره، ضحية واقعة مؤلمة هزّت مشاعر الجميع بعد أن اعتدى عليه جارهم، طالب بالصف الأول الثانوي الصناعي، في أحد الشوارع الجانبية المظلمة بالقرية.
بكاء الأم
الأم بدأت حديثها بصوت مبحوح من البكاء: “ابني كان بيلعب قدام البيت زي كل يوم، وفجأة اختفى شوية، ولما رجع كان مرعوب، عيونه مليانة خوف، وماكنش قادر فحضنته وسألته مالك؟ قالي الولد الكبير خدني في الشارع اللي ورا ووجعني جامد، وقال لي لو حكيت لحد هيضربني ويموت بابا وماما”
تسكت الأم لحظة، ثم تتابع وهي تمسح دموعها: “ماكنتش مصدقة في الأول، بس لما شفت شكله وطريقته، قلبي وجعني، خدناه على المستشفى وحررنا محضر في مركز الزرقا، والشرطة قبضت على الولد اللي عمل كده، بس بعد أربع أيام خرج! ازاي؟ ده دمر حياة ابني”
الأب كان غاضب جدًا، قال بنبرة مليانة قهر: “أنا راجل غلبان، بس حقي مش هسيبه، الولد ده جارنا، يعني ابني شايفه كل يوم، وبيخاف لما يشوفه، ابني بقى مش بينام، ومش عايز يخرج من البيت، وكل شوية يسأل (هو الولد خرج؟)”
الأم تقاطع الكلام والدموع تنزل من غير توقف: “بعيش في رعب من يوم اللي حصل، ابني اتغير، مابيتكلمش زي الأول، حتى ضحكته راحت، كل ما حد يخبط على الباب بيجري يحتمي فيا، أنا أم ومش عايزة غير العدل، ابني اتكسر من جوه”
خايف أخرج
الطفل نفسه كان حاضر اللقاء، قاعد جنب والدته، صوته خافت وهو بيقول: “مش عايز أخرج برا يا ماما، الولد بيخوفني”
نظراته كانت كأنها بتحكي وجع أكبر من سنه، بينما الأب بصوت حزين قال: “أنا مش طالب غير حق ابني، إحنا مش هنسيبها تعدي اللي عمل كده لازم يتحاسب عشان يكون عبرة”
الأم أضافت في نهاية الحوار: “اللي حصل ده لازم يتوقف، مفيش طفل يعيش الرعب اللي عاشه ابني، ولا أم تحس بالعجز ده، نفسي القانون ياخد مجراه، عشان أحس إن لسه في أمان وعدل”
انتهى اللقاء وسط صمت طويل، والوجع كان باين على وشوشهم، الطفل ماسك في إيد أمه بقوة، كأنه خايف تفلت منه الأمان، والأب قاعد شايل همه وهم ابنه في نفس الوقت.
واقعة كفر المياسرة مش مجرد حادثة، لكنها نداء قوي بضرورة تشديد العقوبات لحماية الأطفال من أي انتهاك، ودعم الأسر نفسيًا بعد مثل هذه التجارب القاسية، فالأم أنهت كلامها بجملة قصيرة لكنها موجعة: “مش عايزة غير العدل.. ابني اتظلم كفاية”
