بتحط الفلوس تحت باب المحلات المقفولة..شيماء سيف تكشف عن موقف خيري للفنانة يسرا
تحدثت الفنانة شيماء سيف عن إحدى المواقف الخيرية التي قامت بها الفنانة القديرة يسرا خلال تصوير مسلسل 1000 حمدالله على السلامة والذي عُرض في موسم رمضان 2023، مشيرة أن مساعدة يسرا للغير أمر فطري بطبيعتها.
وقالت شيماء سيف خلال حضورها ندوة يسرا بمهرجان الجونة السينمائي: كنا بنصور مسلسل 1000 حمدالله على السلامة الصبح بدري والمحلات كلها قافلة، يسرا كانت بتطبق الفلوس وتحطها من تحت الباب بتاع المحلات علشان يصحوا ويلاقوا حاجة حلوة هي عملتها وتسعدهم.. فخورة أنك الـ Best friend بتاعتي.
وكانت تحدثت الفنانة يسرا عن بداياتها في مجال الفن والصعوبات التي واجهتها خلال تلك الفترة، بعد مشاركتها في عدد من الأعمال التي لم تحقق النجاح المنتظر، بجانب حديثها عن ذكرياتها مع فيلم الإرهاب والكباب والأجر الذي حصلت عليه من هذا العمل ، وذلك خلال ندوة تكريمها بمهرجان الجونة السينمائي في دورته الثامنة.
بداية أعمالها
وقالت يسرا خلال ندوتها : أنا عملت 25 فيلم في بداية حياتي وكلهم سقطوا سقوط ذريع، قلت طب هكمل ليه والغلط جاي من مين؟، بدأت أحاسب نفسي وروحت المعهد وأنا مش تلميذة فيه .
وعن علاقتها بالجمهورقالت: الوقت علمني إن حتى لما يبقى في حاجة مضايقاني الجمهور ملوش ذنب، إنتو ليكوا حق عليا إلى حد ما وإني أكون معاكم، بس إن حياتي تكون مفتوحة تمامًا قدامكم دي حاجة مش هتريحني، والنهاردة بنقول كلام على السوشيال ميديا وبيتقص وكل واحد بيعمل حاجة على مزاجه ف ده بيخليني أكون واخدة بالي أكتر.
أما عن استعانة فستانها من فيلم الإرهاب والكباب لعرضه في مهرجان الجونة، قالت: أنا فتحت ستين شنطة عشان أطلع فستاني في الإرهاب والكباب عشان يحطوه في المعرض بتاعي في مهرجان الجونة، لما دخلت المعرض شوفت حياتي من ساعة ما اتولدت، أنا فخورة إن فات 50 سنة وأنا محستش بيهم، استفدت من الرحلة بتاعتي وحسيت إني عملت أسطورة للناس اللي بعدينا.
وواصلت: ممتنة أوي لكل الناس اللي أضافوا لحياتي من يوم ما مثلت لغاية دلوقتي من غير حب الناس مفيش حاجة مهما عملت، مفيش حد ممكن يوصل لخمسين سنة شغل من غير حب الجمهور وزمايلي.
أجر يسرا في الإرهاب والكباب
كما كشفت يسرا عن أجرها في فليم الإرهاب والكباب، وقالت: وحيد حامد بعتلي على فيلم الإرهاب والكباب ولقيت الاسكريبت شخصيتي مكتوبة فيه فتاة ليل مشهد واحد، أخدت أجر 10 جنيهات، وصممت فستاني الأحمر في يوم واحد، وطلع العمل زي ما أنتو شوفتوه وبرغم إنه مشهد واحد قولت لـ أستاذ وحيد أنا جاهزة أمثل معاك وإديني 10 جنيهات أجر.
